Psaalms 091
001Dij touholdt in schoelstee van Alderhoogste,
zel overnachten in schaar van Aalmachtege.
002Ik zeg tegen de HEER: "Mien touvlocht en mien bunker,
mien God, doar ik op vertraauw."
003Hai zel joe redden van t slagnet van vogelvanger
en van verwoestende pest,
004mit zien vlerken zel hai die bedekken,
onder zien vleugels kinstoe schoelen,
zien traauw is schild en schaarm.
005Huifst ter nait benaauwd veur wezen, dast die griezen most bie naacht,
nait veur piel dij vlogt overdag,
006nait veur pest dij in t duustern rondgaait,
nait veur t verdaarf dat om mirreg touslagt.
007Al valen der doezend om die tou,
en tiendoezend aan dien rechterzied,
t zel nait aan die toukommen.
008Zelst t allain mor zain mit dien ogen,
en ook zain hou mit goddelozen ofrekend wordt.
009Ie binnen ja mien touvlocht, HEER.
Alderhoogste, ie hebben joen börg baauwd.
010 Der zel die gain kwoad overkommen
en gain ploag zel dien tènt te noa kommen.
011 Want hai zel zien engels bestellen
dat ze die bewoaren op aal dien wegen.
012 Dat ze die op handen droagen,
dast die vout nait stötst aan n vlint.
013 Zelst op lutje laiw en gifslaang trappen
en jonge laiw en dikke slaang verpoazen.
014 "Omdat hai zok aan mie hecht het, zel ik hom redden,
ik zel hom in vrijhaid brengen omdat hai mien noam ken.
015 As hai mie aanropt zel ik hom antwoorden,
as hai in benaauwdens zit, zel ik bie hom wezen,
ik zel hom redden en belonen,
016 ik zel hom rij zien levensdoagen geven,
ik zel hom mien haail zain loaten."
|
