Psaalms 009
001Veur meziekmeester. Op wies van: De dood van de zeun. n Psaalm van David.
002Aan joe mout ik daank zeggen, HEER,
vanoet mien haile haart,
aal joen wonderdoaden mout ik rondvertellen.
003Ik bin zo blied om joe, ik zing joe tou,
ik zing joen noam, o Alderhoogste!
004Nou goan mien vijanden op loop,
zai sloagen zo mor tegen de grond,
zai kommen om bie t zain van joen gezicht.
005Ie hebben veur mie in t plaait beslist,
ie, rechtveerdege rechter, vanòf joen hoge rechterstoul.
006Ie hebben de volken de wacht aanzegd,
en goddelozen om haals brocht,
alderdeegs heur noam heb ie veur aiweg oetwist.
007Mit de vijand is t nou doan,
heur steden heb ie in puun legd, veur aaltied.
Is gainain dij zok heur nog heugen kin.
008De HEER, dij zit veur aiweg op zien troon,
zien rechterstoul staait kloar veur t gericht.
009Hai regaaiert de wereld rechtveerdeg,
hai oordailt de volken noar gerechteghaid.
f + Psaalm 9 en 10 vörmen mit zien baaident n acrostichon: de verzen begunnen aaid mit n volgende letter van t Hebreeuwse alfabet. Psaalm 9 en 10 binnen nait haildaal volledeg: der mekaaiern n aantal letters aan en n poar regels valen boeten t alfabet.f*
010 De HEER wil n vaaileg hoes wezen veur verschoppelingen,
n steveg stainhoes veur mensken in benaauwdens.
011 Dij joen noam kennen, HEER, dij kinnen op joe reken,
dij joe zuiken, HEER, loat ie nait in de steek.
012 Zing joen psaalms veur de HEER dij op Sion woont,
vertel van zien doaden maank ale volken.
013 Hai vragt rekenschop veur t bloud dat vergoten is,
hai denkt om de doden,
hai verget t geschraif van verschoppelingen nait.
014 Heb meedlieden mit mie, HEER,
kiek toch, hou mien vijanden mie te noa kommen,
droag mie op joen aarm bie poorten van de dood vandoan.
015 Den kin ik, in de poorten van stad Sion,
vertellen over aal joen grode doaden,
van haarten blied dat ie mie red hebben.
016 De volken valen in t gat
dat ze zulm groaven hebben,
ze zitten mit vouten vaast in t klapnet
dat ze zulm opzet hebben.
017 De HEER let van zok heuren, hai dut recht,
de goddelozen kommen vaast te zitten
in t waark van heur aigen handen. qs higgajon, selaqs*
018 Loaten de goddelozen votgoan noar t dodenriek tou,
ale volken dij God vergeten haren.
019 n Aarme man wordt nait veur aiweg vergeten,
de hoop van verschoppelingen is nait veur aaltied verloren!
020 Kom in t èn, HEER, loaten mensken joe nait oetdoagen,
loaten de volken oordaild worden onder joen ogen.
021 Joag volken schrik aan, HEER,
loaten ze mor waiten, dat zai mensken binnen. qs selaqs*
|
