Jeremia 35
01Jeremia kreeg dit woord van de HEER in tied van keunenk Jojakim van Juda, zeun van Josia:
02"Goa noar Rechabieten tou en hoal heur over mit die te goan noar tempelzoalen en baid heur doar wien aan."
03t Belokte mie Jaäzanja, zeun van Jirmeja en klaainzeun van Chabassinja, mit zien bruiers, zien zeuns, en aander Rechabieten,
04noar de HEER zien hoes te kriegen, in t onderkommen van zeuns van Chanan, zeun van Jigdaljahu, de godsman. Dij zoal lag noast jonkers heurent en boven dij van Maäseja, zeun van Sallum, man dij tempelbewoaker was.
05Ik zette Rechabieten kroeken wien en bekers veur en nuigde heur tou te tasten.
06Mor zai zeden: "Nee, bedankt, wie drinken gain wien. Ons voader Jonadab, ain van Rechab, het ons dat verboden. Zien zeggen was: 'Ie maggen gain wien drinken, ie nait, en joen zeuns net zo min.
07Ie maggen ook gain hoezen zetten, nait zaaien en gain wiendroeven poten. Doar mag ie ook gain aigender van wezen. Aal joen levensdoagen mout ie in tènten wonen. Den zel ie laank leven in t laand doar ie as vremden touholden.'
08Aal dij opdrachten van ons voader Jonadab, zeun van Rechab, bin we noakommen. Wie drinken nooit gain wien. Ons vraauwlu en ons kinder ook nait.
09Wie zetten gain hoes, wie hebben gain droevetoenen, gain baauwlaand, gain zaaigoud
10 en wonen dou we in tènten. Wie holden ons aan ales dat voader Jonadab ons veurschreven het.
11 Eerst dou keunenk Nebukadnessar van Babylonië dit laand binnenvalen was, heb we zegd: 'Loat we noar Jeruzalem tou goan om te ontkommen aan legers van Chaldeeërs en Arameeërs.' Dat zodounde woon we nou in Jeruzalem."
12 Dou kreeg Jeremia dit woord van de HEER:
13 "Dit zegt de HEER van de machten, Israëls God: Goa tegen manlu van Juda en inwoners van Jeruzalem zeggen: Hier kin ie wat van leren! Zó mout ie om mien zeggen geven - godssproak van de HEER.
14 Jonadab, zeun van Rechab, zien opdracht dat zien zeuns gain wien drinken zollen, wordt noakommen. Tot vandoag aan dag tou drinken ze gain wien, omreden heur stamvoader wol dat nait lieden. Mor ie lustern nait noar wat ik joe aal ogenblik zeg.
15 Aalweg vannijs heb ik mien knechten, de profeten, noar joe toustuurd mit bosschop: Kom tou aander gedachten en beter joen levent. Loop nait achter aander goden heer en vereer ze nait. Den blief ie wonen in t laand dat ik joe en joen veurolden doan heb. Mor ie hebben nait lusterd en mie nait geheurzoamd.
16 Jonadab, zeun van Rechab, zien noazoaten hebben doan wat heur stamvoader bestelde. Mor dit volk het nait noar mie lusterd.
17 Doarom - zegt de HEER, God van de machten, God van Israël: Ik breng over Juda en inwoners van Jeruzalem ale rampen doar ik heur mit draaigd heb. Ik heb heur ja aantoald, mor ze hebben nait lusterd, ik heb heur roupen, mor ze gavven gain beschaaid."
18 Tegen Rechabieten zee Jeremia: "Dit zegt de HEER van de machten, Israëls God: Ie hebben joen stamvoader Jonadab geheurzoamd, aal zien veurschriften onderholden en doun wat hai joe besteld het.
19 Doarom - zegt de HEER van de machten, Israëls God: Jonadab, zeun van Rechab, zel nooit gain verlet hebben om noazoaten dij bie mie in dainst binnen."
|
