Jeremia 24
01Ik kreeg n vizioun van de HEER: ik zag twij körven mit viegen stoan bie tempel van de HEER. t Was vlak noadat keunenk Jechonja van Juda, zeun van Jojakim, en oadel van Juda, mit smeden en slöddemoakers, deur keunenk Nebukadnessar van Babylonië, oet Jeruzalem noar Babel transpetaaierd wazzen.
02In aine körf zatten meroakel beste viegen, viegen van eerste plok zo t rekent. In aander körf zat min goud, te min om op te eten.
03De HEER vruig mie: "Wat zugst, Jeremia?" Ik zee: "Viegen! Aine pertij is meroakel, mor aander is haile min, te min om op te eten."
04Dou kreeg ik dit woord van de HEER:
05Dit zegt de HEER, Israëls God: Krekt as veur dizze beste viegen, zo goud zörg ik veur lu oet Juda, dij ik votstuurd heb noar t laand van Chaldeeërs.
06Heur welwezen heb ik allain veur ogen. Ik breng heur noar dit laand weerom. Ik baauw heur weer op en breek heur nait weer òf. Ik plant heur en rop heur der nait weer oet.
07Ik geef heur n haart dat erkennen wil, dat ik de HEER bin. Zai zellen mien volk wezen en ik heur God, ze zellen ja van haarten bie mie weeromkommen.
08Mor krekt as dij minne viegen, te min om op te eten, zo behandel ik keunenk Sedekia van Juda, net as zien oadel en rest van zien volk, of ze nou in dit laand overbleven binnen of in Egypte touholden - zegt de HEER.
09Ik moak heur tou n schrik veur ale keunenkrieken op wereld, min moakt zellen ze worden, over tong goan, oetvlökt worden, overaal woar ik ze ook mor hèn joag.
10 Sweerd, honger en pest stuur ik op heur òf, totdat ze haildaal verswonnen binnen van grond dij ik heur en heur veurolden doan haar."
|
