Jeremia 23
01O wai, hedders, deur wèl schoapen van mien koppel omkommen en verloren lopen - godssproak van de HEER.
02Doarom, zegt de HEER, Israëls God, tegen hedders dij mien volk waaiden: t Is joen schuld dat mien schoapen t pad biester worden binnen en oet nkander jagd. Ie hebben der nait veur zörgd. Mor ik zörg wel veur joe, aal joen misdoaden zel ik op joe verhoalen - godssproak van de HEER.
03Ik hoal schoapen dij overbleven binnen weer bie nkander oet ale landen vandoan doar ik ze hènjagd heb. Ik breng ze weerom noar heur gruinlaand. Vruchtboar zellen ze weer worden en aanwinnen in tal.
04Den stel ik hedders over heur aan dij heur eerlieks waaiden zellen. Ze huiven nait baang of benaauwd meer te wezen, der zel bie heur gainain kwiet worden - godssproak van de HEER.
05Leuf mie, der komt n tied dat ik n wettege telg van David opstoan loat - godssproak van de HEER. Hai zel bekwoam regaaiern en t laand besturen, rechtveerdeg en recht.
06Den wordt Juda vrij en leeft Israël vaaileg. Dit is noam dij men hom geft 'HEER, ons gerechteghaid'.
07Der komt n tied - godssproak van de HEER - dat men nait meer zegt: 'Zo wis as de HEER leeft, dij Isrelieten oet Egypte laaid het,'
08mor: 'Zo wis as de HEER leeft, dij noazoaten van Israël weerombrocht het oet landen vandoan doar hai heur hènjagd haar. Wonen zellen ze weer op heur aigen gerechteghaid."
09Over profeten:
"Riddersloagen bin ik, haildaal, ik tril over aal mien leden.
n Doene kerel liek ik wel, dij wien noar kop stegen is -
zo stìnvol zit ik van de HEER zien haailege woorden."
10 "t Haile laand zit vol mit echtbrekers,
doarom ligt t ter treureg bie,
verdreugd is t gruin in woestijn.
Allenneg op kwoad binnen ze oet,
in onrecht zuiken ze heur kracht.
11 Alderdeegs profeten en priesters is min goud,
in mien aigen hoes heb ik heur
trappaaierd op misdoaden
- godssproak van de HEER.
12 Doarom wordt weg dij ze bewandeln
n sliesterg pad in t duustern,
doar ze strovveln en valen.
Want ik breng rampen over heur,
as tied van straf der heer is
- godssproak van de HEER.
13 Ik heb zain dat profeten van Samaria
wat vrezelks deden:
ze treedden op as Baälsprofeten
en mien volk Israël
brochten ze op biesterboan.
14 Mor profeten van Jeruzalem
zag ik nog maler dingen doun:
traauwbreuk begoan en leugens verkopen.
Minne mensken pittjeden ze aan
in heur slechteghaid,
gainent denkt ter aan zok te betern.
t Haile loug is mie ain Sodom,
aal t volk ain Gomorra.
15 Doarom - zegt de HEER van de machten over profeten:
Ik geef heur bitter goudje te eten
en vergifteg wotter te drinken,
want deur profeten van Jeruzalem
komt slechteghaid over t haile laand.
16 Zo zegt de HEER van de machten: Luster nait noar wat profeten joe verkundegen. Ze bedraigen joe over ale kanten. Heur viziounen hebben ze bie zokzulm opbedocht, n bosschop van de HEER is t wizzenzeker nait.
17 Tegen heur dij t woord van de HEER niks in reken hebben, zeggen ze: 't Zel joe goud goan - zegt de HEER.' Tegen elk dij deurtoert mit slechtdoun: 'Der komt joe niks van over!'
18 Mor wèl van heur zat in road van de HEER? Wèl was ter bie en heurde wat hai onnaaierde? Wèl vernam zien besloeten en brochde dij over?
19 Störm van de HEER stekt op,
n dikke windhoos brekt lös
over minne mensken.
20 Grammiedeghaid van de HEER
komt nait eerder tou bedoaren
tot hai aal zien plannen oetvoerd het.
Loater wordt joe dit kloar.
21 Ik heb dij profeten nait om bosschop stuurd,
al lopen ze ook nog zo haard.
Niks heb ik tegen heur zegd,
en toch treden ze op as profeet.
22 Haren ze zeten in mien road,
den zollen ze mien besloeten
t volk wel kundeg moaken
en t ofbrengen van t verkeerde pad,
van heur minne doun en loaten.
23 Bin ik n God dij stoef bie is
of nait veuleer n God van wied weg?
- godssproak van de HEER.
24 Naargens kin n mensk beziedkroepen
of ik zai hom wel
- godssproak van de HEER.
Hemel en eerde binnen vol van mie
- godssproak van de HEER.
25 Ik heur profeten zeggen dij in mien noam leugens verkopen: 'Ik haar n dreum!'
26 Houlaank gaait dat nog deur? Wat hebben ze veur, dij profeten, dij bosschoplopers mit aigen opbedenksels?
27 Ze vertellen mien volk wat ze dreumd hebben en denken den dat ze doar mien noam deur vergeten zellen. Net zo as heur veurolden dij mien noam vergaten veur Baäl zienent.
28 Profeet dij n dreum het, kin bloots zeggen dat e n dreum haar, mor dij mien woord kregen het, kin eerlieks mien woord vertellen.
Wat het stro mit waait te doun?
- godssproak van de HEER.
29 Mien woord is n vuur,
n hoamer dij n rots stokkendslagt
- godssproak van de HEER.
30 Ik verzeker joe: ik bin tegen profeten dij woorden van nkander stelen of t mienent wazzen - godssproak van de HEER.
31 Ik bin tegen profeten dij ales wat heur over lippen komt as oroakels bestempeln - godssproak van de HEER.
32 Ik bin tegen profeten dij mien volk op biesterboan brengen mit heur opbedochte dreumen, mit heur leugens, heur stroom van woorden - godssproak van de HEER. Ik heb heur nait stuurd, heur nooit opdracht geven. Dit volk het haildaal gain wil van heur - godssproak van de HEER.
33 As ain, al was t ook n profeet of n priester, joe vragt: 'Wat is de HEER zien 'last' nou?' den zelstoe zeggen: Ie binnen zulm n dikke lastpost! Mor ik smiet joe van scholders òf! - godssproak van de HEER.
34 As n profeet, n priester of wèl den ook mor, t nog over 'de HEER zien last' het, den wait ik dij wel te vinden, en zien haile femilie derbie!
35 Vroag nkander laiver: 'Wat is de HEER zien antwoord? Wat het hai zegd?'
36 Woorden as de HEER zien 'last' mag ie nait meer bruken. As ie dat aal doun, zel ie der zulm last mit kriegen. Ie verdraaien den God zien woorden, de God dij leeft, de HEER van de machten.
37 Ie mouten profeet vroagen: 'Wat is de HEER zien antwoord? Wat het hai zegd?'
38 Dit zegt de HEER: As ie t toch over de HEER zien 'last' hebben, aalhouwel ik joe woarschaauwde dat nait te doun,
39 den til ik joe nou mitnkander op en dizze stad ter bie, dij ik aan joe en aan joen veurolden geven heb, en smiet ik dij van mie òf.
40 Schimp en schaande breng ik over joe, veur aiweg! t Wordt nooit vergeten!"
|
