Jeremia 36
01In t vaaierde joar van t bestuur van keunenk Jojakim van Juda, zeun van Josia, kreeg Jeremia dit woord van de HEER:
02"Pak n boukrol en taiken doar in aan wat ik zegd heb over Israël en Juda en over ale aander volken, dou ik begunde die aan te toalen van Josia zien tied òf tot vandoag aan dag tou.
03Licht dat t hoes van Juda zien levent betert, as ze vernemen van ale rampen dij ik heur aandoun wil. Den kin ik ze heur zunden en kwoaie praktieken vergeven."
04Jeremia luit Baruch, zeun van Neria, roupen en dij taikende in boukrol ale woorden van de HEER aan dij Jeremia hom véúrzee.
05Dou gaf Jeremia Baruch opdracht: "Nou ze mie tegenholden noar de HEER zien hoes tou te goan,
06mostoe der hèngoan en op vastendag oet boukrol woorden van de HEER dij ik die véúrzegd heb aan altmoal dij der touholden, veurlezen. Ook aan Judeeërs dij oet aander steden kommen binnen.
07Meschain beden ze de HEER en betern heur levent. De HEER is ja hoagels op dit volk."
08Baruch, Neria zien zeun, dee wat profeet Jeremia hom besteld haar en leesde in de HEER zien hoes oet boukrol veur, wat de HEER zegd haar.
09In negende moand van t viefde bestuursjoar van keunenk Jojakim van Juda, zeun van Josia, vastten inwoners van Jeruzalem, en ook aal t volk oet steden van Juda dat noar Jeruzalem toukommen was om de HEER te vereren.
10 Baruch leesde dou in de HEER zien hoes aan altmoal dij der touhuilen oet boukrol ales veur wat Jeremia zegd haar. Dat gebeurde in koamer van Gemarja, zeun van schriever Safan. Dij zien onderkommen lag aan t bovenste plaain, stoef bie Nijpoort.
11 Dou Micha, Gemarja zien zeun en Safan zien klaainzeun, ale woorden van de HEER dij in boukrol stonden, aanheurd haar,
12 ging e noar schriever zien waarkkoamer in t pelaais van keunenk. Ale hoge heren zatten doar krekt in vergoadern bie nkander: schriever Elisama, Delaja, Semaja zien zeun, Elnatan, zeun van Achbor, Gemarja, zeun van Safan, en Sidkia, ain van Chananja, mit aander jonkers.
13 Micha vertelde heur wat e Baruch aan altmoal veurlezen heurd haar oet boukrol.
14 Heren stuurden dou Jehudi, Netanja zien zeun, klaainzeun van Selemja en bet-achterklaainzeun van Kusi, noar Baruch tou mit bosschop: "Kom hierhèn mit boukrol dijstoe t volk veurlezen hest." Baruch, zeun van Safan, ging mit rol noar heur tou.
15 "Goat zitten," zeden ze tegen hom, "en lees!" Baruch begunde.
16 Dou ze t altmoal heurd haren, keken ze nkander verbalderd aan. "Dat mout keunenk votdoalek waiten!" zeden ze tegen Baruch.
17 "Vertel ais: woar komt ales wastoe schreven hest, heer?"
18 Baruch zee: "Van Jeremia! Hai het mie t woord veur woord véúrzegd en ik schreef ales mit inkt in t bouk."
19 Dou zeden ze tegen Baruch: "Kroep gaauw bezied mit Jeremia! Gain mensk mag waiten woar ie zitten!"
20 Ze gingen noar t hòf en brochten keunenk van ales op hoogte. Boukrol haren ze in schriever Elisama zien waarkkoamer liggen loaten.
21 Keunenk stuurde Jehudi doar hèn om boukrol op te hoalen. Dij leesde hom veur aan keunenk en aan leden van t hòf dij der omtou stonden.
22 Keunenk was in zien winterpelaais. Hai zat bie t vuur. t Was negende moand ja.
23 Hailtied as Jehudi n kolom of drij, vaaier, lezen haar, snee keunenk ze mit n pènmeske òf en smeet ze in t vuur, net zo laank tot haile rol opbraand was.
24 Keunenk wer der nait hait of kold van en zien hofdainders al net zo min. Gainent ropte zok de klaaier stokkend.
25 Elnatan, Delaja en Gemarja stonden der bie keunenk slim op aan rol nait op te branden. Mor hai wol nait noar heur lustern.
26 Joa, net aansom: hai kommedaaierde zien zeun Jerachmeël, en Seraja, Azriël zien zeun, mit Selemja, ain van Abdiël, schriever Baruch en profeet Jeremia op te pakken. Mor de HEER huil heur bezied.
27 Dou keunenk boukrol mit ales wat Jeremia Baruch véúrzegd haar, opbraand haar, kreeg Jeremia dit woord van de HEER:
28 "Pak die n aander rol en taiken der vannijs ales in aan wat of ter in rol ston dij keunenk Jojakim van Juda opbraand het.
29 Tegen keunenk Jojakim van Juda zulm most zeggen: Dit zegt de HEER: Ie hebben boukrol opbraand en zegd: 'Woarom heb ie doarin schreven: Keunenk van Babel komt dit laand verrinnewaaiern dat ter gain mensk of daaier overblift'?
30 Doarom - zegt de HEER over keunenk Jojakim van Juda: Der zel gainent van zien noazoaten op troon van David zitten. Zien liek zel overdag in hetten liggen blieven en snaachts in kolde.
31 Ik zel zien minne doaden stravven en dij van zien noazoaten en hofdainders derbie. Ik stuur op heur en op inwoners van Jeruzalem en lu van Juda ale rampen òf, dij ik aankundegd heb. Lusterd hebben ze ja nait!"
32 Jeremia langde schriever Baruch n nije rol aan. Dij schreef doar in wat of Jeremia hom véúrzee: ales wat in boukrol stoan haar dij deur keunenk Jojakim van Juda opbraand was, mit nog veul meer zuksoort bosschoppen.
|
