Jeremia 28
01Dou Sedekia nog mor net keunenk van Juda was, in viefde moand van t vaaierde joar, zee profeet Chananja, zeun van Azzur oet Gibeon tegen mie, doar priesters en t haile volk bie wazzen in t hoes van de HEER:
02"Dit zegt de HEER van de machten, God van Israël: ik sloag t juk van keunenk van Babel in braiten.
03Binnen twij joar breng ik hier ale schatten weerom dij keunenk Nebukadnessar van Babel oet de HEER zien tempel mitnomen het.
04Jechonja, zeun van Jojakim, keunenk van Juda, breng ik ook oet Babel noar dit stee weerom, en ale lu dij oet Juda verbannen binnen, derbie - godssproak van de HEER - want ik sloag t juk van keunenk van Babylonië stokkend."
05Dou zee profeet Jeremia tegen profeet Chananja, doar priesters en elk dij in de HEER zien hoes touhuilen, bie wazzen:
06"Loat de HEER dat asjeblieft doun! Ik hoop dat de HEER aal wat ie veurzegd hebben, gebeuren let en schatten oet tempel en lu dij verbannen binnen oet Babel weerombrengt.
07Mor luster nou ook ais noar wat ik joe en aal dizze mensken te zeggen heb:
08Profeten dij der veur joe en mie west hebben, hebben machtege landen en grode keunenkrieken aaltied oorlog, honger en pest aanzegd.
09Mor n profeet dij vree aanzegt, is eerst echt ain dij de HEER stuurd het, as wat e aankundegd het, ook oetkomt."
10 Dou ropte profeet Chananja Jeremia t juk van nek òf en sluig dij in braiten.
11 Tegen altmoal dij der bie stonden, zee e: "Zo zegt de HEER: Zo sloag ik t juk van keunenk Nebukadnessar van Babylonië stokkend. Binnen twij joar pak ik dij ale volken van nek òf." Dou ging Jeremia ziens weegs.
12 Mor eefkes loater noadat profeet Chananja t juk stokkendsloagen haar, kreeg Jeremia dit woord van de HEER:
13 "Goa noar Chananja tou en zeg tegen hom: Dit zegt de HEER: n Holten juk heb ie in braiten sloagen, n iesdern juk komt ter veur in stee.
14 Want zo zegt de HEER van de machten, Israëls God: Ik leg ale volken n iesdern juk op nek. Ze zellen dainstboar wezen mouten aan keunenk Nebukadnessar van Babylonië. Alderdeegs over wilde daaiern geef ik hom macht."
15 Tegen Chananja zulm zee Jeremia: "Luster goud, Chananja! De HEER het joe nait stuurd. Ie wekken vaalze verwachtens bie dit volk.
16 Doarom - zegt de HEER: Ik maai joe vot van eerde. Dit joar nog zel ie oet tied kommen, omdat ie rebulie tegen de HEER preekt hebben."
17 In zeuvende moand van dat joar kwam profeet Chananja te overlieden.
|
