Jeremia 10
01Israël, luster noar wat of de HEER tegen joe zegt:
02Dit zegt de HEER:
Neem gebruken van aander volken nait over,
schrik nait van taikens aan lucht,
ook al worden aander volken der kèl van.
03Wat zai doun het niks om hakken:
ze kappen in t bos blokken holt,
n vakman nemt ze mit baaidel onder handen,
04hai moakt ze mooi mit gold en zulver,
spiekert boudel goud vaast mit hoamer
dat ze nait wibbeln.
05Spouken in komkommertoen, dat binnen t:
proaten kinnen ze nait,
ze mouten droagen worden,
gain stap kinnen ze verzetten.
Wees der nait baang veur,
ze kinnen gain kwoad doun,
mor goud al net zo min."
06HEER, gainent is aan joe geliek,
ie allenneg binnen groot,
en groot is joen noam en macht.
07Elk mout ontzag veur joe hebben,
Keunenk van de volken, dat komt joe ja tou.
Maank wieze lu van volken
en onder keunenkrieken is gainent aan joe geliek.
08Altmoal mit nkander binnen ze dom en dwoas.
Heur ofgoden binnen van holt,
09besloagen en bedoan mit bladzulver oet Tarsis
en gold oet Ufaz,
deur vaklu moakt,
bewaarkt deur goldsmid mit aigen handen.
Bekled mit blaauw en roodsangen:
altmoal t waark van kundege vaklu.
10 Wis en woar, de HEER is God,
hai is God dij leeft, keunenk veur aaid.
Veur zien kwoadens trilt eerde,
veur zien grammiedeghaid holdt gain volk t oet."
11 "Dit mout ie tegen heur zeggen:
Goden dij hemel en eerde nait moakt hebben,
zellen van eerde en hemel verswinnen."
12 Mor hai muik eerde deur zien kracht,
en het mit wieshaid wereld sticht,
mit kunde spraaidde hai hemel oet.
13 Zien dunder boldert mit geweld:
t wotter gobbelt tou lucht oet.
Hai let wolken opkommen
van oetènnen van wereld.
As t regent, smeedt hai weerlichten,
hoalt wind veurndag oet schuren.
14 Mensken stoan riddersloagen,
ze kinnen der mit verstand nait bie.
Goldsmid schoamt zok veur zien beelden,
wat e goten het is kloar bedrog,
der zit gain spiertje leven in,
15 t binnen dingen van niks, veur spot stoan ze.
As t op ofreken aankomt, worden ze verdoan.
16 God van Jakob is nait net as zai,
hai is vörmer van ales
en Israël is zienent.
Zien noam is HEER van de machten.
17 "Pak joen boudeltje bie nkander
vot, tou t laand oet,
ie, bewoners van insloten stad.
18 Want dit zegt de HEER:
As stainen slinger ik dit moal ale volk oet dit laand.
Ik zet heur in kniep,
dat ze t goud waiten!"
19 "O wai mie! Wat heb k mie zeer doan,
mien wonden worden nait weer beter.
Ik dochde alderdeegs:
Dit lieden kin k wel verdroagen.
20 Mor mien tènt is vernaild,
ale lienen stokkendbroken.
Mien kinder binnen mie ontvalen,
vot binnen ze apmoal.
Der is gainent dij mien tènt opzet,
mie t tèntdak weer spant."
21 "Hedders wazzen onwies,
ze zöchten nait noar de HEER.
Doarom laip t aal in toeze,
haile koppel is verspraaid.
22 Heur ais! Doar kommen ze aan,
t rommelt ter over oet t noorden,
ze moaken van Juda zien steden ain wildernis,
n stee doar jakhaalzen touholden."
23 "Ik wait t wel, HEER,
gain staarveling het t in de macht
zien aigen weg te bepoalen;
gain mensk komt doar e zulm hèn wil.
24 Straf ons den, HEER, mor billek en mit moate,
nait in kwoadens, aans heb we der west.
25 Stört joen grammiedeghaid oet
over volken dij joe nait kennen,
over geslachten dij joe nait bie noam nuimen,
want ze hebben Jakob vernaild,
verdizzelwaaierd en verropt,
van zien gruinlaand hebben ze n wildernis moakt."
|
