Jeremia 01
01Woorden van Jeremia, Chilkia zien zeun, ain van priesters oet Anatot in Benjamin.
02De HEER richtte t woord tou hom in tied van keunenk Josia van Juda, n zeun van Amon. t Was in t dattiende joar van zien bestuur.
03Noaderhaand richtte de HEER t woord tou Jeremia in tied van t bestuur van keunenk Jojakim van Juda, n zeun van Josia. Dat is deurgoan tot t elfde joar van Sedekia, Josia zien zeun en keunenk van Juda. In viefde moand van dat joar wer t volk van Jeruzalem votvoerd.
04Ik kreeg dizze bosschop van de HEER:
05"Veurdat ik die vörmde in schoot van dien moeke, koos ik die oet, veur dastoe geboren was, bestemde ik die veur mie, ik heb die aanwezen as profeet veur de volken."
06Ik zee: "Och heden, HEER, mien God, ik kin t woord nait aan, k bin veuls te jong!"
07Mor de HEER antwoordde: "Zeg nou nait: 'Ik bin veuls te jong!' Goa noar elk doar ik die hènstuur en zeg tegen heur wat of ik die bestel.
08Wees nait baang veur heur, ik bin ja bie die om die te redden - godssproak van de HEER."
09Dou stook de HEER haand oet, kwam mien mond aan en zee tegen mie: "Ik leg mien woorden bie die in mond.
10 Joa, op t heden benuim ik die over volken en over keunenkrieken, om ze oet te reuden en òf te breken, te vernailen en te verrinnewaaiern, om ze op te baauwen en op rieg te zetten."
11 Ik kreeg dit woord van de HEER: "Wat zugstoe, Jeremia?" "Tak van n mandelboom," zee k.
12 De HEER weer: "Goud bekeken! Ik hol woak bie mien woord en ik dou wat ik zeg!"
13 Nog n moal kreeg ik n woord van de HEER: "Wat zugst?" "n Kokende kedel. Van noordkaant òf hangt e schuun over."
14 De HEER zee: "Oet t noorden vandoan wordt ellèn oetgoten over altmoal dij in dit laand wonen.
15 Want ik roup ale lu bie nkander van keunenkrieken van t noorden - godssproak van de HEER. Heur keunenks zellen kommen en heur troon hènzetten vlak veur Jeruzalems poorten, tegen muren aan rondom stad, rondom ale steden van Juda.
16 Den spreek ik mien vonnes oet over wat of ze misdoan hebben: ze hebben mie rug toukeerd en hebben ovvers brocht aan aander goden en veur wat ze zulm moakt hebben, binnen ze op knijen goan.
17 Kom aan den, in t èn en zeg heur ales wat ik die bestel. Loat die deur heur gain angst aanhuzen, aans huus ik die angst aan veur heur.
18 Ik moak vandoag n verstaarkte stad van die, n iesdern zoel, n kopern muur tegen t haile laand over: tegen keunenks en bestuurders van Juda, tegen priesters en börgers.
19 Zai zellen die bestrieden, mor die niks doun kinnen. Want ik bin bie die om die te redden - godssproak van de HEER."
|