Jeremia 25
01Dit woord van de HEER kreeg Jeremia veur t haile volk van Juda. Dat was in t vaaierde joar van t bestuur van keunenk Jojakim van Juda, zeun van Josia, in t joar dat Nebukadnessar keunenk van Babylonië wer.
02Profeet Jeremia zee tegen t haile volk van Juda en ale inwoners van Jeruzalem:
03"Van t dattiende joar òf dat Josia, zeun van Amon, keunenk van Juda was, tot op dag van vandoag tou, drijentwinneg joar laank, kreeg ik t woord van de HEER. Aingoal heb ik joe aantoald, mor lusterd heb ie nait.
04De HEER het zien knechten, de profeten, noar joe toustuurd, aalweg vannijs, mor ie hebben nait om mien zeggen geven.
05Ik zee aal ogenblik: 'Hol op mit joen minne gedrag en joen verkeerde levent. Den blief ie wonen op gerechteghaid dij de HEER aan joe en joen veurolden doan het, veur aaltied.
06Loop nait achter aander goden heer, dain ze nait en vereer ze net zo min. Offrontaaier mie nait mit dij beelden dij iezulm moakt hebben, aans loat ik joe omkommen.'
07Mor ie hebben nait noar mie lusterd - godssproak van de HEER. Taargd heb ie mie mit dij beelden dij iezulm moakt hebben - tou joen aigen ongelok.
08Doarom - zegt de HEER van de machten: Omreden ie hebben nait noar mie lusterd,
09roup ik ale volken oet t noorden op en keunenk Nebukadnessar van Babylonië, mien knecht, der bie - godssproak van de HEER. Ik stuur heur òf op dit laand, op aal dij der wonen en op ale volken in de buurt. Ik vergraim heur en moak heur veur aaltied tou n schrik. Elk het de spot mit heur en gainent het heur meer in reken.
10 Stilvalen loat ik heur roupen van bliedschop en vreugde, t zingen veur bruud en brudeman, t knaarzen van meulenstain, t licht van laamp.
11 t Haile laand wordt ain aldernoarste puunbult. Seuventeg joar laank zellen dizze volken keunenk van Babylonië dainstboar wezen.
12 Mor noa dij seuventeg joar zel ik keunenk van Babylonië en zien volk heur misdoaden betoald zetten - godssproak van de HEER. Van Chaldeeërs heur laand moak ik ain toesternust, veur aaltied.
13 Ales wat ik over dit laand zegd heb, loat ik gebeuren, ales wat opschreven staait in dit bouk." Dit het de HEER tegen Jeremia zegd over de volken:
14 "Staarke volken en dikke keunenks zellen heur op heur beurt onder vouten lopen. Ik betoal heur heur minne doaden weerom."
15 Dit zegt de HEER, Israëls God, tegen mie: "Pak dizze beker van mie aan en loat ale volken noar wèl ik joe toustuur, wien van mien gram drinken.
16 Loat heur drinken tot ze der over waggeln as haalfmalen, vanwegens t sweerd dat ik op heur ofstuur."
17 Ik nam beker aan oet haand van de HEER en luit ale volken doar hai mie op ofstuurde, der oet drinken:
18 Jeruzalem en steden van Juda mit heur keunenks en vernoame lu, om der n puunbult van te moaken, n schrik, vrij kuur veur spot en vluik;
19 farao, keunenk van Egypte en zien hofdainders, zien hoge heren, zien volk
20 en ale vremden; keunenks van Us; keunenks van Filistijnen: van Askelon, Gaza, Ekron en wat ter nog over is van Asdod;
21 Edom, Moäb en Ammon;
22 keunenks van Tyrus, van Sidon, van kontrainen aanderkaant zee;
23 Dedan, Tema, Buz en ale lu mit kòrt knipt hoar;
24 keunenks van Arabië en ale lu dij in woestijn wonen;
25 keunenks van Zimri, van Elam en van Medië;
26 keunenks in t noorden, stoef bie en wiedvot. In ain woord: ale keunenkrieken op haile wereld, woar of ze ook mor liggen. As leste van altmoal drinkt keunenk van Sesach der oet.
27 De HEER zee: "Den mostoe tegen heur zeggen: Dit zegt de HEER van de machten, Israëls God: Drink joe doen aan t sweerd dat ik joe stuur, tot ie der van spijen, tot ie der bie deelvalen en nait meer in t èn kommen.
28 En as ze waaigern beker dijstoe heur aanlangst van die aan te pakken, den mostoe tegen heur zeggen: Dit zegt de HEER van de machten: Drinken zél ie!
29 Rampen dij ik breng over stad dij mien noam dragt, binnen t begun nog mor, en ie denken dat ie der veur vot kommen? Gain sproake van, ie kommen der nait onder oet! Ik kommedaaier t sweerd op tegen altmoal dij op wereld wonen - godssproak van de HEER van de machten.
30 Doe most heur aanzeggen:
De HEER brolt oet hemel,
zien stem dundert oet zien haaileg hoes.
Hai baldert tegen zien stad,
as ain dij aan t droeven paarzen is,
zo ropt hai mit geweld
tegen aal dij eerde bewonen.
31 t Lewaai van krieg dringt deur
tot aan oetènnen van wereld.
De HEER gaait in t plaait tegen volken,
hai oordailt over ale mensken,
goddelozen levert hai oet aan t sweerd
- godssproak van de HEER.
32 Dit zegt de HEER van de machten:
Doar brekt de hel lös
en treft aine volk noa t aander,
of n dikke poest wind opstekt
oet ale houken en hörns van wereld.
33 Zai dij op dij dag ombrocht binnen deur de HEER,
liggen op grond,
van aine kaant van wereld tot aander.
Gainent dij om heur treurt,
gainent dij ze bie nkander brengt,
gainain dij heur begroaven dut:
liggen blieven ze as mis op t laand.
34 Hedders, zing n kloaglaid, roup t oet!
Rol joe in t stof, hedders van t vij!
Nou is t zo wied:
aanbroken is dag dat ie slacht worden,
as vedde bokken vaal ie deel.
35 Hedders heur touvlocht is naargens meer te vinden,
hedders van t vij kinnen nait meer ontkommen.
36 Heur hedders kloagen,
dij op heur vij pazen, schraiven,
de HEER verrinnewaaiert heur koppels.
37 Vreedzoame vetwaaide is platpoasd,
deur glìnne gram van de HEER.
38 As n laiw kwam hai oet zien schoelstee,
joa, heur laand wer n toesternust
deur hoagelse kwoadens
en glìnne gram van de HEER."
|
