Jeremia 19
01Zo zegt de HEER: "Koop die n stainen kroek. Goa den mit n man of wat van oldsten van t volk en van priesters
02noar t Hinnomdaal bie Diggelpoort en roup doar om wat ik die bestel.
03Most tegen heur zeggen: Keunenks van Juda en inwoners van Jeruzalem, luster noar t woord van de HEER. Dit zegt de HEER van de machten, Israëls God: Rampen breng ik over dit stee, dat elk dij t heurt, oren toeten zellen.
04Want ze hebben mie in steek loaten, dit stee veur mie onherkenboar moakt. Ze hebben der ovvers brocht aan aander goden dij ze nait kend hebben en heur veurolden en keunenks van Juda net zo min. t Drift hier altmoal van t bloud van onschuldege mensken.
05Der binnen deur heur ovverhögten baauwd veur Baäl om heur kinder veur hom te verbranden. Ik haar heur zoks nait besteld en heb ter ook nooit van waiten wild.
06Doarom komt ter n tied - godssproak van de HEER - dat dit stee nait meer Tofet hait of Hinnomdaal, mor Moorddaal.
07Ik zet n kruus deur plannen dij Juda en Jeruzalem doar beroamd hebben. Ik breng heur om mit t sweerd van vijanden dij t op heur veurzain hebben. Vogels en wilde daaiern zellen op heur lieken oazen.
08Tou n schrik moak ik dizze stad en n taiken van spot. Elk dij der langs komt, staait verbiesterd over aal dij rampen en holdt oam in.
09Ik breng heur zo wied dat ze t vlaais van heur aigen kinder eten en dat ze nkander verslinden. Zo dik hebben vijanden dij t op heur veurzain hebben heur in nood en in kniep brocht!
10 Den mostoe veur t oog van manlu dij mit die goan binnen, dij kroek in groezelementen smieten
11 en zeggen: Zo zegt de HEER van de machten: Zo as je dizze kroek in groezelementen smieten dat e nait meer te moaken is, zo vergraim ik dit volk en dizze stad. Tofet wordt ain groot dodenhof.
12 Zo goa ik te waark mit dit stee en mit dij der wonen - godssproak van de HEER. Ik moak dizze stad aan Tofet geliek.
13 Jeruzalems hoezen en keunenks van Juda heurent worden net zo onnuur as Tofet. Aal dij hoezen doar men op platdak wierook brand het veur zun, moan en steerns aan lucht en doar ze wienovvers brochten aan aander goden."
14 Dou ging Jeremia van Tofet, doar de HEER hom mit dizze bosschop hènstuurd haar, noar t veurhòf van de HEER zien hoes. Hai zee tegen t volk:
15 "Zo zegt de HEER van de machten, Israëls God: ik breng over dizze stad en over ale aander steden aal dij rampen doar ik mit draaigd heb. Want ze waaigern stief en stoer noar mie te lustern."
|
