Jeremia 12
01"Ie binnen rechtveerdeg, HEER,
ik kin niks tegen joe inbrengen.
Toch wil k joe wat vroagen:
Woarom gaait t ondeugden goud,
en woarom leven goddelozen zo kaalm en rusteg?
02Je poten heur nait, of ze kriegen al worrels,
ze wazen en droagen vrucht.
Joe hebben ze veuraan in mond,
mor in heur haart is veur joe gain stee.
03HEER, ie kennen mie, ie zain mie,
ie hebben mie haildaal deur.
Sleep heur vot as schoapen noar slachtbaank,
zet heur apaart veur dag van t slachten.
04Hou laank mout grond ter nog dreug bie liggen,
en verkommert t gewas op akker?
Omdat lu dij der wonen nait deugen,
binnen daaiern en vogels verswonnen.
Ze beweren ja: Hai zugt toch nait
hou of t mit ons oflopt."
05"As ie al muite hebben om voutvolk bie te holden,
hou zol ie n peerd den belopen kinnen?
As ie t ter in n vredeg laand al bie zitten loaten,
hou mout dat den mit joe
in waalskaant van Jordaan?
06Ook joen aigen volk let joe al in steek,
alderdeegs joen bruiers en joen zusters,
achter joen rug om hebben ze de spot mit joe.
Vertraauw heur doarom nait,
hou mooi of ze ook mit joe omproaten.
07Ik heb mien hoes opgeven
en ofzain van mien aigendom;
wat mie t laifste was, heb ik vijand over doan.
08Mien aigendom is tegen mie tekeer goan
as n laiw in t bos,
en staait tegen mie te brollen.
Ik heb ter schoon genog van kregen.
09Mien aigendom is as n hyenoa worden,
mit roofvogels der omtou.
Hoal wilde daaiern bie nkander,
loat ze kommen en t opvreten.
10 Hedders hebben mit heur koppels
mien droevetoen verrinnewaaierd,
mien grond verpoasd,
van mien mooiste akker
n dikke wildernis moakt.
11 Joa, onlaand is t worden,
verdreugd en verloaten.
t Haile laand is verdizzelwaaierd,
gainain dij der zörg om het.
12 Over ale koale högten in woestijn
binnen rovers opzetten kommen,
van t aine èn van wereld tot aander tou
wordt gain mensk mit vree loaten.
t Is de HEER zien sweerd, dij t aal verslindt.
13 Waait hebben ze zaaid,
mor stiekels inhoald.
Aal heur pokkeln was vergees,
schoamensweerd, zo is t gemoak,
deur glìnne gram van de HEER.
14 Dit zegt de HEER: Ale minne noabers dij t aigendom dat ik geven haar aan mien volk Israël, aanvalen hebben, joag ik tou heur laand oet, en t hoes van Juda derbie.
15 Mor noadat ik heur verdreven heb, ontfaarm ik mie weer over heur. Ik breng heur weerom, elk noar zien aigen aarfdail en elk noar zien aigen laand.
16 As ze gebruken van mien volk den aannemen en sweren bie mien noam: 'Zo wis as de HEER leeft' - krekt zo as ze eertieds mien volk aanleerden bie Baäls te sweren, den worden ze maank mien volk opnomen.
17 Mor t volk dat nait lustern wil, drief ik vot. Ik verdou heur en vernail ze - godssproak van de HEER."
|
