Jeremia 13
01De HEER zee tegen mie: "Goa n linnen lennendouk kopen, sloag dij om zied en zörg der veur dat e nait nat wordt."
02Dat zodounde kochde ik mie n lennendouk, zo as de HEER besteld haar, en dee dij om.
03Vannijs kreeg ik dit woord van de HEER:
04"Goa noar Eufraat tou mit lennendouk dijstoe kocht hest en stop hom doar bezied in n glief in rotsen."
05Ik ging noar Eufraat en stopte hom doar bezied, zo as de HEER besteld haar.
06n Mooi zetje loater zee de HEER tegen mie: "Goa noar Eufraat tou en hoal dij lennendouk weer op dij ik die doar beziedstoppen luit."
07Ik noar Eufraat, en t stee zuiken doar ik lennendouk beziedstopt haar. Ik huil hom weer veurndag, mor lennendouk was vergoan, hai deugde naargens meer tou.
08Dou kreeg ik dit woord van de HEER:
09"Dit zegt de HEER: Persies net zo zel ik tröts van Juda en Jeruzalem vergoan loaten.
10 Dit minne volk dat nait noar mien woorden lustern wil en mit heur stieve kop achter vremde goden heer lopt, dij daint en vereert, dat volk wordt net zo as dizze lennendouk, dij naargens meer goud veur is.
11 Want net zo strak as lennendouk om zied van ain zit, zo stief haar ik hail Israël en hail Juda aan mie verbonden - godssproak van de HEER. Ze zollen mien volk wezen, mien eer, mien tröts en mien glorie. Mor lustern? Ho mor!
12 Zeg dit tegen heur: Dit zegt de HEER, Israëls God: Kroeken dut men vol wien! As ze den zeggen: 'Net of wie dat nait wozzen!'
13 den mostoe tegen heur zeggen: Dit zegt de HEER: Zo gait ik ale bewoners van dit laand vol, tot ze der doen van worden: keunenks op Davids troon, priesters, profeten en aal t volk van Jeruzalem.
14 Ik sloag heur mit koppen tegen nkander aan in groezelementen, voaders en zeuns mit mekoar - godssproak van de HEER. Ik vergraim ze zunder perdon: t begroot mie niks, omdenken heb ik nait."
15 "Leg joen oor te lustern,
wees ter nait te groot veur!
De HEER het t woord.
16 Geef eer aan de HEER, joen God,
veurdat hai t duuster worden let,
veurdat ie over joen vouten stroekeln
in schemer van baargen.
Ie haren licht verwacht,
mor hai moakt t routduuster,
veraandert ales in swaarde naacht.
17 As ie nait lustern,
zel ik in stilte reren
om dij tröts van joe,
troanen stromen mie over wangen
omdat koppel van de HEER
vottranspetaaierd wordt.
18 Zeg tegen keunenk en zien moe:
Kom van joen hoge troon òf,
want dij pracht-kroon
is joe van kop ofrold.
19 Steden van Negev blieven op slöt,
gainain kin der in kommen.
Juda wordt votvoerd
tot leste man.
20 Kiek es omhoog!
Zai wèl doar aankomt oet t noorden vandoan.
Jeruzalem, woar is koppel dij joe aanvertraauwd wer,
dij prachtege schoapen, woar binnen ze bleven?
21 Wat zol ie der van zeggen
as vrijers van eertieds
ais boas over joe werden?
Zol ie nait krimpen van pien
as n vraauw mit vloagen?
22 Ie vroagen joe òf:
'Woarom komt mie dit altmoal over?'
Omdat ie joe zo bot misdroagen hebben,
wordt joen klaid joe optild,
en kommen ze joe te noa.
23 Kin ain oet Nubië meschain
kleur van zien hoed veraandern,
of n panter zien vlekken?
Net zo min kin ie t goie doun,
bedreven as ie binnen in t kwoad.
24 Doarom joag ik ze oet nkander
as stro in wind.
25 Dat is t löt, dat ik joe toupaart,
omdat ie mie vergeten hebben
en op ofgoden vertraauwen
- godssproak van de HEER.
26 Ikzulm til joe t klaid omhoog tot over kop,
dat elk joen blode gat zain kin,
27 joen klongelderij en joen gaaile lusten,
joen schandoaleg houern en snouern.
Op högten en op vlaktes
heb ik joen ofgodsbeelden wel zain.
Bekloag joe, Jeruzalem!
Houlaank mout dit nog duren,
woar is joen eer?"
|
