Jozua 23
01Dou de HEER Israël al verschaaident joar n levent in vree geven haar, dat zai rondomheer niks meer te vrezen haren van heur vijanden, raip Jozua, dij dou al stafold was, t volk bie nkander.
02Dou aal heur soldoaten, laaiders, rechters en veurgangers kommen wazzen, zee hai tegen heur: "Ik bin nou old en heb nait laank meer te goan.
03Ie hebben zain wat de HEER aalmoal veur joe doan het mit aal dizze volken. De HEER, joen God, het ja zulm veur joe vochten.
04Dou der denk om: ik heb t laand van dizze volken dij nog over binnen, zo goud as t laand van dij volken dij wie al oetreud hebben, aan joe toupaart. t Haile laand, van Jordaan òf, aan Grode Zee tou is veur joe.
05De HEER, joen God, zulm zel volken dij nog over binnen veur joe op loop joagen. Aal heur laand zel ie ook nog kriegen. Dat het de HEER joe ja touzegd.
06Wees ter doarom goud op verdocht om ales krekt zo te doun as t in Mozes zien wetbouk staait, woord veur woord.
07Ie mouten joe nait opholden mit volken dij nog bie joe touholden. Wat heur goden aangaait: nait aanbeden, nait n aid op sweren, nait vereren, nait veur heur op knijen!
08Niks van dat ales. Blief traauw aan de HEER, joen God, zo as t aaltied west het.
09Hai het ja grode en staarke volken veur joe op loop jagd. Gain vijand kon joe aan.
10 Elk van joe kin wel doezend man op loop joagen, want de HEER zulm vecht veur joe. Dat het hai ja touzegd.
11 Dus denk ter aaltied goud om dat ie de HEER laif hebben. Doar hangt joen levent van òf.
12 Want as ie t in kop kriegen om te akkoordjen mit volken dij nog bie joe touholden en in heur omtraauwen, den kin ie der van op aan dat de HEER, joen God, heur nait laanger veur joe op loop joagen zel. Den vangen ze joe as n wilster in flap en as n hoas in struup. En den zellen ze joe zoveul ellèn toubrengen of ie mit sweep tamtaaierd en mit praimen in ogen stoken worden.
13 Net zo laank dat ter gain moudermensk meer van joe over is op dizze goie grond, dij de HEER joe eerst geven haar.
14 Dommit is mien tied ter heer. Doarom wil k joe nog ainmoal stief zeggen: vergeet aal joen levensdoagen nooit, dat ie ale goie dingen dij de HEER joe beloofd het, ook eerliekswoar kregen hebben. t Is apmoal krekt zo oetkommen as de HEER joe touzegd het. Der mekaaiert niks aan.
15 Mor net zo goud zel hai joe ook bezuiken mit ramp en onhaail, as ie nait bie hom blieven en nait doun wat hai mit joe ofproat het.
16 As ie aander goden vereren en veur heur op knijen goan, zel hai glìn op joe worden. En den is t gaauw oflopen in dit goie laand, dat hai joe geven het."
|
