Jozua 08
01Dou zee de HEER tegen Jozua: "Nou nait laanger benaauwd en mismoudeg wezen. Allee, der op lös! Weer op Ai òf, mor nou mit t haile leger. Stad Ai mit haile kontraain, mit zien keunenk en ale lu doar, apmoal zel ik die t geven. Doar kinst wis van op aan.
02Net as bie Jericho mout ie keunenk en aal t volk doodmoaken. Mor t vij en t aander mag ie diskeer zulm holden. Paardie soldoaten mouten zok schoelholden aan achterkaant van stad en aanvalen veurdat lu der op verdocht binnen."
03Eer Jozua der zulm op lös ging mit zien leger, stuurde hai snaachts dattegdoezend van zien alderbeste soldoaten op pad.
04Hai zee tegen heur: "Goud acht geven! Ie mouten beziedkroepen aan aander kaant van stad, zo stoef bie as aaids kin, kloar om in aksie te kommen.
05Ik en mien manlu zellen den aan oostkaant tot vot bie stad optrekken. As ze den tou poort oetkommen en aanvalen, zel wie der weer oetrieten, krekt as eerste moal.
06Den denken zai vanzulm: Dij kerels naaien der weer oet! Zai zellen achter ons heer goan, en zo lokken wie heur bie stad vot.
07Den kom ie veurndag en nemen stad in. De HEER zel joe stad geven.
08Zo gaauw as dat gebeurd is, mout ie brand ter in steken. Zo wil de HEER dat. Dou der denk om dat ie persies doun wat ik joe zegd heb."
09Zo stuurde Jozua dij dattegdoezend man op pad. Zai kropen woaraarns achter stad bezied, aan westkaant tussen Betel en Ai. Jozua bleef zulm dij naacht in t kaamp bie zien soldoaten.
10 Aanderdoagsmörgens, dou t nog duuster was, stelde Jozua heur op. Hai brochde heur, mit laaiders van Israël, zulm op stee.
11 Dou ze aan noordkaant wazzen, gingen ze nait wieder. Der was bloots nog n leegte tussen heur en stad.
12 Dou huil hai om en bie viefdoezend man der oet en zee, ze mozzen zok schoelholden aan westkaant van stad tussen Betel en Ai.
13 Zo was zien leger dus opsteld: hoofdmacht aan noordkaant stad en n lutje ofdailen aan westkaant. Dij aigenste naacht nog ging Jozua mit zien volk leegte in.
14 Dou keunenk van Ai t smörgensvroug in de goaten kreeg, wos hai t wel. Hai ging mit aal zien manlu votdoalek tou stad oet op Isrelieten òf, om weer mit heur te vechten op helgen van leegte bie Jordaan. Hai wos vanzulm nait, dat ter n aander ofdailen kloarston om stad van achtern aan te valen.
15 Jozua en zien volk deden of ze weer manje minst wazzen en gingen der vandeur, kaant van woestijn op.
16 Ale manlu oet stad wazzen optrommeld om achter Isrelieten aan te goan. Ze juigen achter Jozua en zien volk aan, van dij gevolgen dat ze aal wieder bie stad vandoan lokt werden.
17 Der bleef gain man over in Ai en Betel, ze stoven apmoal achter Isrelieten aan. Ze luiten poorten alderdeegs wiedwoagen open stoan.
18 Dou zee de HEER tegen Jozua: "Steek dien spies omhoog noar Ai tou. Ik zel stad in dien macht geven." Dat dee Jozua.
19 Dat was taiken veur lu dij achter stad op loer laggen om rad in t èn te kommen. Ze vlogen der op òf, nammen stad in en stoken boudel vot in brand.
20 Dou manlu van Ai achteromkeken, verdold, haile stad ston in brand, altmoal rook en vuur! Ze konden naargens meer hèn. Isrelieten dij op loop goan wazzen noar woestijn tou, draaiden zok om en vuilen heur aan.
21 Want Jozua en zien volk haren zain, dat lu dij op loer laggen stad innomen en in brand stoken haren. Zodounde haauwden ze op soldoaten van Ai in.
22 Vot kwammen ook soldoaten dij stad innomen haren, der oet en begunden mit te vechten. Zo zatten vijanden rondom hèn tussen Isrelieten, as moezen in vaal. Ze werden verdizzelwaaierd, gain moudermensk bleef der over.
23 Allenneg keunenk van Ai kregen ze leventeg in handen. Dij brochten ze bie Jozua.
24 Zo sluigen Isrelieten börgers van Ai dood in t veld en in woestijn, doar dij achter heur heer zeten haren. Dou ze heur aan leste man tou over klink jagd haren, gingen ze weerom noar Ai en muiken doar elkenain van kaant.
25 Zo is in ain dag aal t volk van Ai om haals brocht, manlu en vraauwlu, mitnkander twaalfdoezend manlu en vraauwlu.
26 Jozua stook zien spies omhoog noar Ai tou, net zo laank dat aal t volk van Ai doodmoakt was, as n ovver veur de HEER.
27 Mor diskeer moggen Isrelieten aal t goud dat zai in stad vonden en t vij zulm holden, zo as de HEER tegen Jozua zegd haar.
28 Jozua luit Ai aan grond tou platbranden, dat ter allenneg n male stainbult overbleef. Dij is ter nou nog.
29 Keunenk van Ai wer ophongen aan n boom. Hai mos doar hangen blieven aan oavend tou. Tegen twijduustern luit Jozua hom der ofhoalen en deelgooien bie ingang van stadspoort. In opdracht van Jozua hebben ze n dikke bult stainen boven op hom vlijd, en dij is ter nou nog aaltied.
30 n Zetje loater gingen Jozua en Isrelieten noar baarg Ebal tou. Hai zee, ze mozzen doar n altoar baauwen veur de HEER, Israël zien God.
31 t Mos n altoar worden van stainen dij nait mit iesdern riw bewaarkt wazzen. Zo haar Mozes, de HEER zien knecht, Isrelieten odder geven en zo staait t ook in zien wetbouk. Op dat altoar brochten ze de HEER brandovvers en vree-ovvers.
32 Doar schreef Jozua Mozes zien wet op stainen ploaten, dat Isrelieten dij lezen konden.
33 Isrelieten, heur laaiders, ofsieren en rechters, zo goud as t vremd volk dat bie heur touhuil, werden verdaild in twij plougen dij elk aan n kaant van aark stoan gingen. Ain haalfschaid aan kaant van baarg Gerizim, aander haalfschaid aan kaant van baarg Ebal. Ze haren altmoal zicht op aark en op priesters, dij mit aark tussen baaide koppels in stonden. Mozes haar zegd, dat priesters t volk zegen mozzen veurdat wet veurlezen wer.
34 Dou dat gebeurd was, leesde Jozua heur haile wet veur mit zegen en vluik, haildaal zo as t in wetbouk ston.
35 Hai sluig gain woord over van wat Mozes opschreven haar. Hai leesde t apmoal veur aan haile vergoadern, mit vraauwlu en kinder en vremden dij mit heur optrokken.
|
