Jozua 19
01Twijde paart dat oetlöt wer was veur ale femilies van stam Simeon. Heur kontrainen laggen midden tussen stam Juda zienent.
07En nog vaaier aander steden mit heur dörpen: Aïn, Rimmon, Eter en Asan.
08Ook ale dörpen om dizze steden hèn aan Baälat-Beër tou, dat ook wel Ramat-Negev hait. Dit was t laand dat stam Simeon kreeg.
09Omdat stam Juda n groder paart van t laand kregen haar as dat zai neudeg haren, werden aan stam Simeon kontrainen midden in t laand van Juda touwezen.
10 Daarde paart was veur ale femilies van stam Zebulon. Heur laand kwam aan stad Sarid tou.
11 Noar t westen tou laip heur grèns noar Marala, den tot stoef bie Dabbeset en beek dij aan oostkaant van Jokneam stroomt.
12 Aan aanderkaant Sarid ging e noar t oosten aan Kislot-Tabor tou, den noar Daberat en omhoog noar Jafia.
13 Doarvandoan wieder noar t oosten noar Gat-Hachefer en Et-Kasin. Grèns kwam oet bie Rimmon en muik den n bocht noar Nea.
14 Aan noordkaant boog grèns om noar Channaton en kwam den op n duur oet bie daal van Jiftach-El.
15 Ook Kattat, Nahalal, Simron, Jidala en Bet-Lechem heurden der bie. Mitnkander twaalf steden mit heur dörpen.
16 Aal dizze steden mit heur dörpen laggen in t laand van stam Zebulon.
17 Vaaierde paart was veur ale femilies van stam Issachar.
18-21 Bie heur laand heurde Jizreël, Kesullot, Sunem, Chafaraïm, Sion, Anacharat, Rabbit, Kisjon, Ebes, Remet, En-Gannim, En-Chadda en Bet-Passes.
2-6 In heur paart laggen dattien steden mit dörpen dij doar bie heurden: Berseba, Sema, Molada, Chasar-Suäl, Bala, Esem, Eltolad, Betul, Chorma, Siklag, Bet-Hammarkabot, Chasar-Susa, Bet-Lebaot en Seruchen.
22-23 In t noorden laip heur grèns van oostkaant van baarg Tabor tot aan Jordaan tou mit steden Sachasim en Bet-Semes, mitnkander zestien steden mit dörpen dij derbie heurden.
Dat wazzen haile kontrainen van stam Issachar.
24 Viefde paart was veur ale femilies van stam Aser.
25-26 Bie heur laand heurden Chelkat, Chali, Beten, Achsaf, Allamelech, Amad en Misal. Baarg Karmel en revier Libnat wazzen heur grèns in t westen.
27-28 Den laip grèns mit n ombogt noar t oosten noar Bet-Dagon, ruik grèns van stam Zebulon en daal van Jiftach-El, noar t noorden tou noar Bet-Haëmek en Neïel en kwam in t noorden oet bie Kabul, Abdon, Rechob, Chammon en Kana, aan Groot-Sidon tou.
29-31 Den weer mit n bocht noar Rama tot stoef bie vestingstad Tyrus, weer n bocht noar Chosa en zo kwam e oet bie zee. Ook Machaleb, Achzib, Akko, Afek en Rechob heurden der bie. Mitnkander twijentwinneg steden mit heur dörpen.
Dizze haile kontrainen kregen ale femilies van stam Aser mitnkander.
32 Zèsde paart was veur ale femilies van stam Naftali.
33 Heur grèns laip van Chelef en aikenboom bie Saänannim over Adami-Nekeb en Jabneël aan Lakkum tou en kwam oet bie Jordaan.
34 Zuudgrèns van Naftali begunde bie Jordaan en ging den noar t westen noar Aznot bie baarg Tabor, doarvandoan noar t noorden aan stad Chukok tou. Den ging grèns noar t westen, bie noordgrèns van Zebulon en oostgrèns van Aser langs, en kwam bie Juda weer oet bie Jordaan, dij heur oostgrèns was.
35-39 In heur kontrainen laggen ook dizze verstaarkte steden: Siddim, Ser, Chammat, Rakkat, Kinneret, Adama, Rama, Hasor, Kedes, Edreï, En-Chasor, Jiron, Migdal-El, Chorem, Bet-Anat en Bet-Semes. Mitnkander wazzen der negentien steden mit dörpen dij doarbie heurden.
Dit wazzen kontrainen van ale femilies van stam Naftali.
40 Zeuvende paart was veur ale femilies van stam Dan.
41-46 In heur kontrainen laggen dizze steden: Sora, Estaol, Ir-Semes, Saällabbin, Ajjalon, Jitla, Elon, Timna, Ekron, Elteke, Gibbeton, Baälat, Jehud, Bene-Berak, Gat-Rimmon, Me-Hajjarkon en Rakkon mit kontrainen om Jafo tou.
47 Mor loater binnen ze heur laand kwietworden en dou binnen ze op stad Lesem ofgoan in t hoge noorden. Dij hebben ze veroverd en ale lu doar doodmoakt. Dou binnen ze doar zulm wonen goan en hebben noam van stad veraanderd in Dan, omreden heur veurvoader haitte zo.
48 Aal dizze steden mit dörpen dij doarbie heurden werden aan femilies van stam Dan toupaart.
49 Dou ze kloar wazzen mit verdailen van t laand gavven ze ook nog n paart aan Jozua in aigendom.
50 De HEER haar zegd dat ze hom stad geven mozzen dij hai geern hebben wol, en zo kreeg e Timnat-Serach in t baarglaand van Efraïm. Dou Jozua dij stad weer opbaauwd haar, ging e doar wonen.
51 Zo hebben priester Eleazar en Jozua en laaiders van ale stammen van Israël t haile laand in Silo verdaild veur tabbernoakel, veur t oog van de HEER.
|