Jozua 12
01Onder laaiden van Mozes haren Isrelieten aal t laand van baaide keunenks aan oostkaant van Jordaan veroverd en in bezit nomen, van Arnondaal òf tot aan baarg Hermon aan tou in t noorden.
02Aine was Sichon, keunenk van Amorieten, in stad Chesbon. Hai was boas over zudelke haalfschaid van t laand Gilead, dat is te zeggen kontrainen tussen beek Arnon aan zuudkaant en beek Jabbok aan noordkaant. Zien keunenkriek ging in t zuudoosten aan stad Aroër tou dij haalfweg beek Arnon ligt, tot aan beek Jabbok tou, doar t laand van Amorieten begunt.
03Westgrèns van zien riek was leegte bie Jordaan, van t Kinneretmeer in t noorden, aan Zoltzee in t zuden tou. Ook kontrainen aan oostkaant Zoltzee, kaant van Bet-Hajjesimot en doar t Pisgagebaargte begunt, heurden der bie.
04Aander keunenk dij ze versloagen haren, was Og, keunenk van Basan, ain van leste Refaïeten. Hai haar n pelaais in Asterot en in Edreï.
05Hai regaaierde over t laand van baarg Hermon en stad Salka in t noorden, over hail Basan aan grèns van Gesur en Maächa in t oosten tou, en over noordelke haalfschaid van Gilead, aan t laand van Sichon tou.
06Onder laaiden van Mozes, de HEER zien knecht, haren Isrelieten dizze baaide keunenks overwonnen, en Mozes haar t laand verdaild onder stammen Ruben en Gad en haalfschaid Manasse.
07Jozua en t volk Israël hebben keunenks aan westkaant van Jordaan versloagen van Baäl-Gad in leegte aan zuudkaant van Libanon tot baarg Halak bie t laand Edom. Elk van aander stammen gaf Jozua n paart van dit laand in aigendom.
08Tot aan dij tied tou haar dit laand west van Hethieten, Amorieten, Kanaänieten, Perizzieten, Chiwwieten en Jebusieten. t Was baarglaand en t legelaand aan oost- en westkaant doar van, t Jordaandaal en t dreuge laand in t zuden.
9-24 Doar versluig Israël 31 keunenks van steden Jericho, Ai (stoef bie Betel), Jeruzalem, Hebron, Jarmut, Lachis, Eglon, Gezer, Debir, Geder, Chorma, Arad, Libna, Adullam, Makkeda, Betel, Tappuach, Chefer, Afek, Lasaron, Madon, Hasor, Simron-Meron, Achsaf, Taänach, Megiddo, Kedes, Jokneam (bie baarg Karmel), Dor (bie Gilgal) en Tirsa. Mitnkander ainendatteg keunenks.
|
