Jozua 11
01Dou Jabin, keunenk van Hasor, heurde van aal dij overwinnens, stuurde hai doalek bodes noar keunenks in de buurt, noar Jobab van Madon, en keunenks van Simron en Achsaf.
02Ook noar keunenks in t heuvellaand in t noorden van Kanaän, in leegte van Jordaan aan zuudkaant van t Kinneretmeer, in kustvlakte van Dor bie zee,
03en noar keunenks van Kanaänieten in t oosten en t westen, noar Amorieten, Hethieten, Perizzieten en Jebusieten in t heuvellaand en Chiwwieten onderaan baarg Hermon in kontrainen van Mispa.
04Zai kwammen der aanzetten mit aal heur soldoaten, volk as muggen, mit n haile bult peerden en striedwoagens.
05Aal dizze keunenks kwammen bie nkander bie beek Merom. Doar sluigen ze heur kaamp op om tegen Israël te vechten.
06De HEER zee tegen Jozua: "Nait baang veur heur wezen, hur! Ik zel der zulm veur zörgen dat ie ze mörgen om distied apmoal van kaant moakt hebben. Ie mouten peerden hakzeen deursnieden en heur striedwoagens opbranden."
07Dou dee Jozua mit zien haile leger n aanvaal op t kaamp van vijanden bie beek Merom, eer ze der op verdocht wazzen.
08De HEER zörgde der veur dat zai n swoare neerloag leden. Isrelieten juigen achter heur heer tot Groot-Sidon en Misrefot-Maïm in t noorden, en tot Leegte bie Mispa in t oosten aan tou. Net zo laank dat ter gainain van vijanden meer over was.
09Vot noatied dee Jozua wat de HEER hom zegd haar: hai snee hakzeen van ale peerden deur en braandde striedwoagens op.
10 Dou keerde hai weerom, ging noar Hasor en veroverde dij stad. Aan dij tied tou haar Hasor boas west over aal dij keunenkrieken. Hai haauwde Jabin, keunenk van Hasor, kop òf.
11 Ook aal aander volk in stad sluigen ze dood tot aan leste man tou, en stoken stad in brand.
12 Jozua het ook aal dij aander steden veroverd. Keunenks der van werden oppakt en mit aal aander lu doodmoakt. Zo haar Mozes, de HEER zien knecht, dat ja zegd.
13 Hai stook allenneg Hasor mor in brand. Aal dij aander steden nait, omreden dij wazzen al baauwd op olde puunheuvels.
14 Isrelieten nammen ales mit wat ze bruken konden. Aal t vij ook. Mor mit mensken haren ze gain perdon.
15 Mozes haar odders van de HEER sekuur deurgeven. Jozua dee dit zuver zo as de HEER tegen Mozes zegd haar.
16 Zo het Jozua t haile laand veroverd: t haile heuvellaand van zuud tot noord aan tou, haile Negev in t zuden, haile pervinzie Gosen, en baargen van Israël mit heur oetlopers, en leegte van Jordaan.
17-18 Van baarg Halak òf, dij in t zuden ligt en omhoog lopt noar Edom tot Baäl-Gad aan tou in Leegte tussen Libanon en baarg Hermon in t noorden. Oorlog mit keunenks dij doar regaaierden, duurde n haile zet deur, mor op n duur het Jozua heur aaltemoal te pakken kregen en doodmoakt.
19 Bloots Chiwwieten in Gibeon is t lokt om mit Isrelieten te akkedaaiern. Aal aandern verzetten zok, net zo laank dat zai zok overgavven aan Isrelieten.
20 Van dij gevolgen dat zai, net as de HEER al tegen Mozes zegd haar, haildaal verdizzelwaaierd werden. Aal t volk wer zunder genoade doodmoakt. Omreden de HEER haar heur zulm zo t rekent instuupt om kop ter veur te holden.
21 Om dijzulfde tied versluig Jozua ook Enakieten dij in Hebron, Debir en Anab woonden en overaal in t heuvellaand van Juda en Israël. Jozua reudde heur rondom oet en van heur steden bleef niks meer over.
22 Zodounde wazzen der gain Enakieten meer in t laand van Isrelieten, op n stokkewat noa dij in Gaza, Gat en Asdod touhuilen.
23 Zo het Jozua t haile laand veroverd, krekt as de HEER tegen Mozes zegd haar. Hai gaf t aan Isrelieten om der aaltied te wonen. Elke stam kreeg n dail van t laand. Dou was ter naargens meer oorlog en haren ze rust.
|
