Jozua 24
01Jozua raip ale stammen van Israël bie nkander in Sichem. Oldsten, laaiders, rechters en ofsieren mozzen noar veuren kommen, zee e. Dij gingen dou stoan veur stee doar God was.
02Dou zee Jozua tegen t haile volk: "Dit zegt de HEER, Israël zien God, tegen joe: n Haile zet leden hebben joen veurolden, Terach en zien zeuns Abraham en Nachor aan gun kaant van Eufraat woond en aander goden eerd.
03Mor ik heb joen veurvoader Abraham doar heerhoald en noar Kanaän brocht. Doar luit ik hom deur t haile laand rondtrekken. Ik heb hom n bult noazoaten geven: eerst zien zeun Isaak.
04Dij kreeg twij zeuns: Jakob en Esau. Esau gaf ik t heuvellaand van Edom, Jakob en zien kinder gingen noar Egypte.
07Zai raipen zo haard as ze konden aan mie om heur te helpen en ik schoof n swaarde wolk tussen joe en Egyptenoars in. Dou luit ik boaren van zee over Egyptenoars hèn rollen en zo binnen ze aalmoal om haals kommen. Ie hebben zo t rekent zulm zain wat ik mit Egyptenoars doan heb. Dou heb ie joaren laank in woestijn omswonnen.
08Op n duur brochde ik joe in t laand van Amorieten aan oostkaant Jordaan. Dij vochten mit joe in t laand, mor ik zörgde der veur dat ie t wonnen. Ik heb heur verdizzelwaaierd, zo kon ie heur laand in bezit nemen.
09Dou kwam Balak, keunenk van Moäb, Sippor zien zeun, tegen joe in aksie. Hai luit Bileam, Beor zien zeun, ophoalen en vruig hom om joe te vervluiken.
10 Mor ik wol nait noar Bileam lustern, en zo kon e in stee van vervluiken niks doun as te zegen. Zo heb ik ter veur zörgd dat Balak niks tegen joe oetrichten kon.
11 Dou bin ie Jordaan overstoken en bie Jericho kommen. t Volk doar wol tegen joe in aksie kommen. Ook Amorieten, Perizzieten, Kanaänieten, Girgasieten, Chiwwieten en Jebusieten vochten mit joe. Mor ik heb ter veur zörgd dat ie wonnen,
12 En dat ze schietensbenaauwd veur joe op loop gingen, net as baaide keunenks van Amorieten aan gun kaant Jordaan. t Was nait deur joen sweerd en boog.
13 Ik heb joe laand geven doar ie nait op aarbaid haren en steden dij ie nait baauwd haren en doar ie toch in wonen kinnen. Ie kinnen wiendroeven eten van droevebozzen dij ie nait kweekt hebben en olieven van bomen dij ie nooit poot hebben.
14 Nou den," zee Jozua, "nou mout ie de HEER eren en zunder mekaaiern aaltied noar hom lustern. Smiet ofgoden vot dij joen veurolders aan gun kaant van Eufraat en in Egypte vereerd hebben. Eer allain de HEER.
15 As ie dat nait willen, den mout ie t zulm mor waiten: of goden aan aanderkaant Eufraat, of goden van Amorieten in dij heur laand ie nou wonen. Mor denk ter goud om, ik en mien volk - wie dainen de HEER."
16 Dou zee t volk: "Nooit n keer zel wie de HEER ontraauw worden. Wie zellen nooit gain aander goden vereren.
17 De HEER het ons veurolders en ons ja oet Egypte, dij sloavenhok, vothoald. Hai het aal dij grode wonders doan dij wie aalmoal ja wel waiten. Hai het ons vaaileg hier heer brocht, dwaars deur aal dij volken, dij haile laange raais.
18 Hai het aal dij Amorieten dij hier touhuilen veur ons op loop jagd. Doarom wil wie, net as ie, de HEER dainen. Hai is ons God en aans gainent."
19 Mor Jozua zee: "Dat zel joe nait touvalen! Der is gainain zo'n God as de HEER. Hai kin t nait velen, dat ie aans ook nog n god vereren. As ie dat aal doun, den kin t nooit weer goud worden.
20 De HEER het aaltied goud veur joe west. Mor paas op, as ie hom rug toudraaien en aander goden vereren. Want den zel hai joe rug toudraaien en zel joe stravven dat ter gainain overblift."
21 t Volk zee tegen Jozua: "Dat zel wie zekerwoar nait doun. Wie dainen de HEER en aans gainent."
22 "Ie kaizen dus veur de HEER en doun der n aid op dat ie hom allain dainen zellen," zee Jozua. "Doar stoan ie nou veur." "Zo is t!" raipen ze, "dat dou wie!"
23 Jozua zee: "Kom aan den, smiet den doalek dij olde ofgoden vot dij ie nog bie joe hebben en beloof dat ie allenneg de HEER, Israël zien God, traauw binnen."
24 "De HEER is ons God en aans gainent," zee t volk. "Wie zellen hom eren en noar hom lustern."
25 Aigenste dag sloot Jozua in noam van God n verbond mit t volk. Doar in Sichem stelde hai wetten en regels op doar ze heur aan holden mozzen.
26 Dij schreef hai op in t bouk doar ook God zien aander wetten veur t volk in stonden. Dou zette hai n hail dikke stain in t èn onder n dikke boom dij bie God zien altoar ston.
27 Hai zee tegen t volk: "Denk ter goud om! Dizze stain is ons getuge. Hai het ales heurd wat of de HEER tegen ons zegd het. En hol joe doaraan, aans zel hai tegen joe getugen."
28 Dou stuurde Jozua t volk weerom noar hoes tou. Elk ging weer hèn doar e vandoan kommen was.
29 n Zetje loater kwam Jozua, Nun zien zeun, de HEER zien knecht, oet tied. Hai is honderdtien joar worden.
30 Hai wer begroaven op zien aigen laand in Timnat-Serach, dat ligt in t heuvellaand van Efraïm, aan noordkaant van baarg Gaäs.
31 Zo laank as Jozua leefde, wazzen Isrelieten traauw aan de HEER. Ook noa zien dood, zo laank as de olde laaiders der wazzen dij ales mitmoakt haren wat de HEER veur Israël doan haar.
32 Zai haren Jozef zien liggoam, dij baalzemd was, mitnomen tou Egypte oet. Hai wer begroaven bie Sichem op n stok laand dat Jakob vrouger aal veur honderd rieksdoalders kocht haar van zeuns van Hemor, Sichem zien voader. Dat laand was toupaart aan Jozef zien zeuns.
33 Ook Eleazar, Aäron zien zeun, kwam oet tied. Dij wer begroaven op n heuvel in t baarglaand van Efraïm. Dij heuvel was van Pinechas, Eleazar zien zeun.
5-6 Loater heb ik Mozes en Aäron doar ook noar tou stuurd. Egypte wer bezöcht deur swoare ploagen. Mor ik heb joe, dat is te zeggen, joen veurolders, doar vothoald en bie Raaitzee brocht. Egyptenoars vanzulm achter heur heer mit striedwoagens en peervolk.
|
