Jozua 18
01Ale Isrelieten kwammen bie nkander in stad Silo. Doar zetten ze tabbernoakel op, omreden ze wazzen in dij kontrainen al boas.
02Mor der wazzen nog aaltied zeuven stammen dij heur paart nog nait kregen haren.
03Doarom zee Jozua: "Hou laank wil ie nog omzoezen? Wanneer goan ie dat laand in bezit nemen? De HEER, de God van joen veurolders, het joe t ja geven!
07Levi zien noazoaten kriegen zo as ie waiten zulm gain laand. Zai maggen priesters van de HEER wezen. En stammen Gad, Ruben en eerste haalfschaid van Manasse hebben van Mozes, de HEER zien knecht, elk heur paart ja al kregen aan oostkaant Jordaan."
08Dou manlu kloarstonden om op pad te goan, gaf Jozua heur dizze opdracht: "Trek deur t laand, moak ter n beschrieven van en kom den bie mie weerom. Den zel ik hier in Silo n löt trekken veur elk van joen stammen, veur t oog van de HEER."
09Zai deden aal wat Jozua zegd haar en kwammen dou weer bie hom in t kaamp bie Silo mit n beschrieven van t laand en n liest van ale steden, ales in zeuven paarten verdaild.
10 Dou lötte Jozua doar in Silo veur t oog van de HEER der om wat paart elk van dij zeuven stammen kriegen zol en paartte heur dat tou.
11 Paart dat ter oetlöt wer veur ale femilies van stam Benjamin lag tussen Juda en Jozef heurent.
12 In t noorden begunde grèns van heur laand bie Jordaan, den omhoog bie noordkaant van baargrug bie Jericho langs, en op t westen aan deur t baarglaand hèn aan woestijn van Bet-Awen tou.
13 Doarvandoan op stad Luz aan, dij ook Betel hait, aan zuudkaant van baargrug bie Luz langs, en den noar Atrot-Addar dij op t gebaargte aan zuudkaant van Leeg-Bet-Choron ligt.
14 Den laip grèns mit n bocht noar t zuden bie westkaant van t gebaargte langs aan Kirjat-Baäl tou. Dizze stad, dij ook wel Kirjat-Jearim hait, is van stam Juda. Dit is westgrèns.
15 Zuudgrèns laip stoef bie Kirjat-Jearim langs noar Ijjim en den noar Me-Neftoächwèl tou.
16 Den laip e aan onderkaant van baarg langs doar t Bin-Hinnomdaal begunt, aan noordkaant van Refaïetenvlakte, en wieder deur t Hinnomdaal noar zudelke helgen van baarg doar Jeruzalem op ligt en wieder noar Rogelwèl.
17 Den muik hai n bocht noar t noorden noar Semeswèl tou, doarvandoan noar Gelilot, liek tegen Adummimpas over. Den noar beneden noar stain van Bohan. Dij Bohan was n zeun van Ruben.
18 Bie noordkaant langs van baargrug dij t oetzicht het op vlakte van Jordaan.
19 Bie noordkaant langs van baargrug bie Bet-Chogla, en op n duur komt grèns den oet bie noordpunt van Zoltzee, doar Jordaan in zee komt. Dit was zuudgrèns.
20 Jordaan was oostgrèns.
Dit wazzen rondom heer grènzen van stam Benjamin zien paart.
21-28 Zai kregen twaalf steden mit dörpen dij doar bie heurden: Jericho, Bet-Chogla, Emek-Kesis, Bet-Araba, Semaraïm, Betel, Awwim, Para, Ofra, Kefar-Haämoni, Ofni en Geba. En nog vattien aander steden mit heur dörpen: Gibeon, Rama, Beërot, Mispa, Kefira, Mosa, Rekem, Jirpeël, Tarala, Sela, Elef, Jebus, dat nou Jeruzalem is, Gibea en Kirjat-Jearim.
Dit wazzen kontrainen dij Benjaminieten toupaart werden.
4-6 Stam Juda het zien dail van t laand al kregen in t zuden, en Jozef zien noazoaten blieven in t noorden. Nou mout elke stam drij manlu aanwiezen. Dij stuur ik den op raais deur t laand. Zai moaken beschrieven van haile kontraain dij ze in bezit nemen willen en verdailen dij in zeuven paarten. As dat gebeurd is, loat t den aan mie zain, den zel ik heur veur t oog van de HEER, ons God, n löt trekken, veur elke stam.
|