Jozua 13
01Dou Jozua stafold worden was, zee de HEER tegen hom: "t Èn is in zicht, hest nait laank meer te goan. Mor der is nog n hail bult laand dat veroverd worden mout:
02t Haile laand van Filistijnen, doar vief keunenks regaaiern over vief steden: Gaza, Asdod, Askelon, Gat en Ekron; en t haile laand van Awwieten in t zuden.
03Ook heb ie t laand nog nait veroverd, dat begunt bie Sichor, dat is te zeggen bie grèns van Egypte, in t noorden tot aan Ekron tou. Aal dizze kontrainen heuren nog bie t laand Kanaän.
04En doar heurt haile kontraain in t noorden ook nog bie, van Ara òf, n stad dij aan Sidoniërs heurt, aan stad Afek tou, bie grèns van Amorieten.
05Ook heb ie kontrainen van Gebol nog nait veroverd, en haile Libanon oostelk van Gebal, van Baäl-Gad, aan zuudkaant van Baarg, tot Hamatpas tou,
08Mozes, de HEER zien knecht, haar eerder al laand toupaart aan stammen Ruben en Gad en eerste haalfschaid Manasse. Dij woonden doar al, aan oostkaant van Jordaan;
09aan stad Aroër tou in t zuudoosten (stad ligt bie beek Arnon, haalfweg beek) en haile hoogvlakte van Medeba aan Dibon tou;
10 ale steden van Sichon, keunenk van Amorieten, in Chesbon, wazzen van heur, aan grèns van Ammon tou;
11 en Gilead en kontrainen van Gesur en Maächa, en t haile baarglaand van Hermon en hail Basan aan Salka tou;
12 en t haile keunenkriek van Og, ain van leste Refaïeten, in Basan, dij pelaais haar in Asterot en in Edreï. Mozes haar dizze baaide keunenks al versloagen en heur volk votjagd.
13 Mit ain oetzundern: Isrelieten hebben inwoners van Gesur en Maächa nait votjagd. Dij wonen nog aaltied middenmaank heur.
14 Allenneg aan lu van stam Levi haar Mozes gain aarfdail geven. De HEER haar tegen hom zegd: "Heur aarfdail is heur aandail in ovvers veur de HEER, Israël zien God."
15 Mozes haar aan femilies van stam Ruben dit dail van t laand geven:
16 Kontraain noordelk van beek Arnon, van stad Aroër òf dij haalfweg beek ligt, en haile hoogvlakte om Medeba tou.
17-20 Chesbon mit aal zien steden dij der omtou liggen op hoogvlakte: Dibon, Bamot-Baäl en Bet-Baäl-Meon, Jahas, Kedemot, Mefaät, Kirjataïm, Sibma, Seret-Hassachar dat op heuvel in leegvlakte ligt, helgens van t Pisgagebaargte, en Bet-Hajjesimot.
21 Ook ale steden op hoogvlakte, t haile keunenkriek van keunenk Sichon van Amorieten. Hai haar keunenk west in Chesbon en Mozes haar hom en zien vief zetboazen in Midjan, Ewi, Rekem, Sur, Chur en Reba versloagen.
22 Bie heur dij Isrelieten doodmoakt hebben, was ook woarzegger Bileam, Beor zien zeun.
23 Aal dizze steden, mit dörpen derbie, werden aan femilies van stam Ruben toupaart as heur aarfdail. Westgrèns van Ruben was Jordaan.
24 Mozes haar ook n dail van t laand oostelk van Jordaan geven aan femilies van stam Gad:
25 Jazer en ale steden van Gilead, en haalfschaid van Ammonieten heur laand aan Aroër tou, dat aan oostkaant van stad Rabba ligt.
26 Stam Gad zien laand gaait van Chesbon òf, aan Ramat-Hammispe en Betonim tou, en van Machanaïm aan grèns van Lo-Debar tou.
27 In t daal van Jordaan kregen ze n poar steden derbie dij vrouger van keunenk Sichon van Chesbon west haren: Bet-Haram, Bet-Nimra, Sukkot en Safon. Heur westgrèns was Jordaan aan t meer van Kinneret tou.
28 Dit was t aarfdail van stam Gad, heur steden en dörpen.
29 Mozes haar ook n dail van t laand toupaart aan haalfschaid van femilies van stam Manasse:
30 Van Machanaïm òf, Basan in zien gehail, t haile keunenkriek dat eertieds van keunenk Og van Basan west haar, en ale sesteg dörpen van Jaïr in Basan;
31 boetendes haalfschaid van Gilead, en Asterot en Edreï, residenties van keunenk Og van Basan.
Dit ales het Mozes toupaart aan haalfschaid van femilies dij ofstamden van Machir, Manasse zien zeun.
32 Zo het Mozes t laand verdaild op hoogvlakte van Moäb, aan aanderkaant Jordaan, oostelk van Jericho.
33 Aan stam Levi het Mozes gain laand in bezit geven as aarfdail. De HEER, Israëls God, is zulm heur aarfdail. Dat haar hai heur touzegd.
6-7 dat is t haile gericht van Sidon, van Libanon òf tot Misrefot-Maïm tou. Ale Sidoniërs dij doar wonen, zel ik veur Isrelieten op loop joagen. Heur laand mostoe aan Isrelieten touwiezen, aan de negen overbleven stammen en aan twijde haalfschaid van stam Manasse. Dat heb ik ja bevolen. Der mout om löt worden wat stok elke stam, krigt. Allee, verdail t vot mor!"
|
