Jozua 06
01Oet benaauwdens veur Isrelieten huil Jericho poorten potdicht. Der kon gain mensk oet of in.
02De HEER zee tegen Jozua: "Nou most goud lustern. Ik geef Jericho mit zien keunenk en aal zien soldoaten in dien macht.
03Doe en aal dien weerboare manlu mouten ain moal doags om stad tou trekken en dat zès doagen achternkander.
04Aark gaait ook mit. Zeuven priesters mouten veur aark aan lopen, elk mit n ramshoorn. Op zeuvende dag mout ie zeuven moal om stad tou en ondertied mouten priesters op hoorns bloazen.
05Noa de zeuvende moal mout ie n laange toon bloazen. Votdoalek as ie dat heuren, mout t haile leger hail haard begunnen te roupen. Den zel haile stadsmuur instörten en ie mouten liekoet, elk van t stee doar e staait, tou stad in klimmen."
06Dou raip Jozua priesters bie nkander en zee tegen heur: "Pak aark op en zeuven van joe mouten elk mit n ramshoorn veur aark aangoan."
07Tegen soldoaten zee hai: "Moak joe kloar veur n mars om stad tou. Gounent van joe mouten as veurhoede veur aark aangoan, kloar om te vechten."
10 Jozua haar tegen zien volk zegd: "Ie maggen nait roupen en alderdeegs gain woord zeggen, tot t zo wied is dat ik joe opdracht geef om te roupen. Mor den ook vot zo haard as ie kinnen."
11 Zo ging aark dij eerste dag ain moal om stad tou. Dou gingen ze weer noar t kaamp en wachtten doar op dag van mörgen.
12 Aanderdoags was Jozua der weer vroug bie. Priesters pakten aark weer op scholders.
13 Krekt as eerste dag laipen zai om stad tou, veuraan de gevechtskloare veurhoede, den de zeuven priesters mit aark en doar weer achteraan t aander volk. Aalvot wer der op hoorns bloazen.
14 Dizze twijde dag gingen ze ook weer ain moal rondom stad tou en noatied weer noar t kaamp. Zo ging dat zès doag achternkander.
15 Mor zeuvende dag stonden ze veur dag en doage al kloar en gingen in aigenste volgorde as aander doagen rondom stad tou. Mor nait ain, mor zeuven moal.
16 Noa zeuvende moal, dou priesters op hoorns bloazen haren, zee Jozua tegen zien volk: "Roup zo haard as ie kinnen! Nou zel t wezen! De HEER het stad ja aan joe geven.
17 Ie mouten stad en aal wat ter in is kòrt haauwen. En ale mensken en aal t vij van kaant moaken as n ovver veur de HEER. Bloots Rachab, dij hoer, en elk dij bie heur in hoes is, mout ie leven loaten. Zai het spionnen ja beziedstopt.
18 Ie mouten overaal ofblieven wat as n ovver veur de HEER bestemd is. Aans kin joen aigen kaamp mit grond liekmoakt worden, en den is t joen aigen schuld.
19 Mor aal t zulver en gold, ale koper en iesderspullen mout ie in t schathoes van de HEER brengen as n ovvergoave."
20 Dou wer der haard op hoorns bloazen. Votdoalek dou soldoaten dat heurden, begunden zai hail haard te roupen. Muur donderde deel en zai klommen noar binnen, elk van t stee doar e ston. Zo hebben ze stad veroverd.
21 Zai grepen t sweerd en muiken elkenain in stad van kaant, manlu, vraauwlu, kinder en olden. Koien en schoapen en ezels gingen der ook aan. Rachab en heur volk luiten ze leven.
22 Jozua haar tegen baaide manlu dij kontrainen teveuren bekeken haren, zegd: "Ie hebben dij vraauw touzegd dat aal dij bie heur in hoes wazzen, niks overkommen zol. Doarom hoal heur altmoal op en breng heur op n vaaileg stee."
23 Jongkerels gingen noar heur hoes tou. Zai huilen Rachab op, ook heur voader en mouder, heur bruiers en aal dij sib tou heur wazzen. Zai brochten heur noar n stee doar ze vaaileg wazzen, boeten t kaamp van Israël.
24 Zai stoken stad in brand, oetgezunderd t zulver, gold en koper en iesderspul. Dat brochten ze in t schathoes van de HEER.
25 Jozua luit Rachab en heur volk leven. Zai moggen middenmaank Isrelieten wonen blieven, omreden Rachel haar spionnen beziedstopt. Zai wonen nog aaltied in t laand.
26 Dou stad in puun lag, dreef Jozua Isrelieten op t aid dat ze Jericho nooit weer opbaauwen zollen. Hai zee:
"As ain hom dat lapt,
zel de HEER hom zekerwoar stravven.
As hai fonnementen legt veur n nije stadsmuur,
zel zien oldste zeun omkommen,
bie fonnementen veur poorten zien jongste."
"Zo is t!" zee t volk.
27 De HEER ston Jozua in ales bie. Zien foam ging deur t haile laand.
8-9 Krekt zo as Jozua odder geven haar, gebeurde t. Veurhoede, priesters mit hoorns, den aark en doar achteraan t aander soldoatevolk. Aalvot klonk t hoornbloazen.
|
