Jozua 04
01Dou t haile volk goud en wel aan aanderkaant van Jordaan was, zee de HEER tegen Jozua:
02"Ie mouten twaalf manlu kaizen, oet elke stam ain.
03Zeg heur dat elk n dikke vlint doargunders oet Jordaan pakken mout van stee doar priesters stoan. Dus mitnkander twaalm. Dij mouten ze mitnemen en deelleggen op stee doar vannaacht joen kaamp is."
04Dou raip Jozua dij twaalf manlu bie zok
05en zee tegen heur: "Goa over Jordaan hèn aan aark tou. Doar mout ie elk ain stain oppakken, veur elke stam ain.
06Dij binnen veur joe n aandenken van wat de HEER hier veur joe doan het. As joen kinder loater vroagen: 'Pa, wat hebben dij vlinten ainlieks te beduden?'
07den mout ie heur vertellen dat Jordaan ophuil mit stromen dou aark van de HEER der deur ging. Dizze vlinten zellen t volk Israël hier aaltied aan denken doun."
08Manlu van Israël deden wat de HEER tegen Jozua zegd haar. Zai pakten twaalf stainen tou Jordaan oet, veur elke stam ain, nammen dij mit noar t kaamp tou en legden ze doar deel.
09Jozua luit ook twaalf stainen in Jordaan opvlijen, op stee doar priesters mit aark stoan haren. Dij stainen binnen doar nou nog.
10 Jozua gaf t volk de HEER zien zegen en ales gebeurde krekt as Mozes t ook al tegen Jozua zegd haar. Ondertied dat priesters mit aark in Jordaan stoan bleven, trok t volk rad noar overkaant.
11 Dou ze den apmoal goud en wel aan aanderkaant wazzen, gingen priesters der ook over mit de HEER zien aark en zöchten heur olde stee weer op.
12 Net as Mozes zegd haar, gingen ook manlu van stammen Ruben en Gad en haalfschaid van Manasse veur t volk aan, kloar om in aksie te kommen.
13 Ze gingen mit om en bie vattegdoezend man veur aark aan, noar vlakte bie Jericho.
14 Dij dag zörgde de HEER der veur dat Jozua bie t haile volk hoog in aanzain kwam. Zai haren ontzag veur hom, zien haile levent laank, net as aaltied veur Mozes.
15-17 Dou zee Jozua in opdracht van de HEER tegen priesters dij aark mit wet der in druigen, dat zai ook oet Jordaan op waal kommen mozzen.
18 Vot dou priesters aan aanderkaant kommen wazzen, kwam t wotter weer opzetten en wer weer net zo braid as veurtied.
19 t Was tiende dag van eerste moand dou t volk aan overkaant kwam en ze heur kaamp opsluigen bie Gilgal, aan Jericho zien oostgrèns.
20 Doar luit Jozua ook dij twaalf vlinten dij ze oet Jordaan mitnomen haren, in t èn zetten.
21 Hai zee tegen Isrelieten: "As joen kinder joe loater vroagen wat dizze vlinten te beduden hebben,
22 den mout ie heur vertellen dat Israël hier mit dreuge vouten deur Jordaan goan is.
23 De HEER, joen God, het Jordaan veur joe opdreugen loaten. Net as hai dat ook doan het mit Raaitzee.
24 De HEER het dit doan, omreden hai wil dat ale mensken op wereld der wait van hebben hou machteg hai is, en ie aaltied ontzag veur hom hebben."
|
