Ester 08
01Aigenste dag gaf keunenk Ahasveros aan keunegin Ester t hoes van Haman, dij jeudenhoater. Mordechai kwam bie keunenk, want Ester haar verteld hou hai tou heur ston.
02Keunenk dee zegelring òf dij hai Haman ofpakken loaten haar en gaf hom aan Mordechai. En Ester stelde Mordechai aan over t hoes van Haman.
03Vannijs richtte Ester zok tou keunenk. Zai luit zok veur zien vouten deelvalen en smeekte hom dat hai t minne plan van Haman, noazoat van Agag, dij e tegen Jeuden beroamd haar, mislukken loaten zol.
04Keunenk langde Ester golden scepter tou. Zai kwam in t èn, ging veur keunenk stoan
05en zee: "As keunenk t goud tou liekt en as ik zien genegenhaid wonnen heb, as keunenk t rechtveerdeg vindt en as ik hom behoag, loat der den n schrieven oetgoan om braiven in te trekken doar t plan in staait van Haman, zeun van Hammedata, noazoat van Agag, om Jeuden oet te reuden in ale gewesten van keunenk.
06Want hou zol ik t onhaail aanzain kinnen dat over mien volk kommen zol? Hou zol ik t aanzain kinnen dat mien volk oetreud wordt?"
07Keunenk Ahasveros zee tegen keunegin Ester en Jeud Mordechai: "t Hoes van Haman heb ik al aan Ester geven en homzulm heb ik op n poal spietsen loaten, omdat hai zok aan Jeuden vergriepen wol.
08Wat joe nou goud tou liekt wat Jeuden aangaait, schrief dat oet noam van keunenk en zegel dat mit zegelring van keunenk. Want n schrieven dat oet noam van keunenk schreven is en zegeld mit zegelring van keunenk, kin nooit herroupen worden."
09Op t aigenste ogenblik werden schrievers van keunenk roupen, op n drijentwinnegsten van daarde moand, moand siwan, en ales wer schreven doar Mordechai opdracht tou gaf, aan Jeuden en aan stadholders en landvoogden en vorsten van ale gewesten, van India òf tot aan Nubië tou, honderdzeuventwinneg gewesten, aan elk gewest in zien aigen schrift en aan elk volk in zien aigen toal. Jeuden werden ook aanschreven in heur aigen schrift en toal.
10 Men schreef oet noam van keunenk Ahasveros en zegelde mit zegelring van keunenk en stuurde braiven vot mit bodes dij op peerden van keunenk reden, fokt in keunenk zien staal.
11 In braiven ston, dat keunenk aan Jeuden in ale steden touston om zok te verzoameln en om t levent te verweren. Aal dij woapens druigen van t volk en t gewest dij heur in t naauw brengen zollen, moggen ze doodmoaken en oetreuden, mit vraauwen en kinder, en heur goud moggen ze zok touaigen.
12 In ale gewesten van keunenk Ahasveros zol dit recht gelden op ain en dezulfde dag en wel op dattiende dag van twaalfde moand, moand adar.
13 Dat schrieven gol as wet dij ofkundegd worden mos in ale gewesten en bekendmoakt aan ale volken, zodat Jeuden zok veur dij dag kloarmoaken konden om zok te vreken op heur vijanden.
14 Bodes op keunenklieke peerden gingen op bevel van keunenk inderhoast aan raais. Wet wer ook ofkundegd op börg Susa.
15 Mordechai ging bie keunenk vot in n blaauwsangen linnen klaid en mit n grode golden baand mit edelstainen veur kop en n fien linnen, sangen mantel aan. Stad Susa joechaaide en was blied.
16 Licht en bliedschop, vreugde en eer was Jeuden heur dail worden.
17 In ale gewesten en steden, overaal doar wet en woord van keunenk bekendmoakt werden, was der vreugde en bliedschop maank Jeuden. Ze huilen moaltieden en vierden feest. En maank volken van t laand wer mennegain Jeud, want schrik veur Jeuden zat ter goud in.
|
