Ester 02
01Noa verloop van tied, dou grammiedeghaid van keunenk Ahasveros bedoard was, dochde hai weer aan Wasti, aan wat zai doan haar en wat of der over heur besloten was.
02Dou zeden keunenk zien knechten, dat men zol veur keunenk jonge wichter zuiken mouten dij nog moagd wazzen en knap om te zain.
03Keunenk zol doarveur in ale gewesten van zien riek amtenoars aanstellen mouten en dij zollen ale jonge wichter dij knap wazzen om te zain, verzoameln mouten in börg Susa in t vraauwenhoes, onder touzicht van Hegai, keunenk zien koamerheer, dij bewoaker is van vraauwen. Zai zollen ales toulangd kriegen mouten om zok mooi te moaken.
04t Wichtje dij in ogen van keunenk mooiste is, zol keunegin worden mouten in stee van Wasti. Dit veurstel kwam keunenk goud veur en hai dee der noar.
05Nou was der in börg Susa n Jeudse man dij Mordechai haitte. Hai was n zeun van Jaïr, zeun van Simi, zeun van Kis, oet stam Benjamin.
06Hai was ain van lu dij mit Jechonja, keunenk van Juda, deur Nebukadnessar, keunenk van Babylonië, verbannen en wegsleept was oet Jeruzalem.
07Hai was pleegvoader van Hadassa, ook Ester nuimd, n dochter van zien oom, want zai haar gain pa of moeke meer. Dou heur pa en moeke sturven wazzen, haar Mordechai heur aannomen as zien dochter. Zai was n nuver wicht en knap om te zain.
08Dou keunenk zien besloet en wet bekendmoakt wazzen en verschaaiden wichter bie nkander brocht werden in börg Susa onder opzicht van Hegai, wer Ester ook noar t keunenkliek pelaais brocht en onder touzicht steld van dij bewoaker van vraauwen.
09Hai haar kiek op t wicht en huil heur goud veur ogen, dat zunder mekaaiern zörgde hai veur ales doar zai zok mooi mit moaken kon en veur heur eten. Hai luit heur beschikken over zeuven gedainstegen van hoge komòf oet t hoes van keunenk. Boetendes brochde hai heur mit heur gedainstegen noar t mooiste dail van t vraauwenhoes.
10 Ester haar heur volk en heur komòf nait bekendmoakt. Mordechai haar heur instoekt dat zai dij nait nuimen mos.
11 Aal doagen vannijs koierde Mordechai bie veurhof van t vraauwenhoes langs om oet te vigelaaiern hou t mit Ester ging en wat of der mit heur gebeuren zol.
12 As nou n wichtje aan beurt was om bie keunenk Ahasveros te kommen, noadat zai twaalf moand ondergoan haar wat veur vraauwen bepoald was (tied om zok mooi te moaken was zo indaild: zès moand mirre-eulie en zès moand kruden en aander middels om zok mooi te moaken),
13 den kwam t wichtje zó bie keunenk: ales wat ze hebben wol oet t vraauwenhoes kreeg ze mit noar keunenk zien pelaais.
14 Ze ging soavends noar binnen en smörgens kwam ze weerom en ging noar n aander dail van t vraauwenhoes, dat onder touzicht steld was van Saäsgaz, bedainde van keunenk en bewoaker van bievraauwen. Zai mog nait bie keunenk weeromkommen, of t mos al wezen dat keunenk zien zinnen op heur zet haar en dat zai mit noam en tounoam roupen wer.
15 Dou Ester aan beurt was - dochter van Abichaïl, dij n oom was van Mordechai dij heur as dochter aannomen haar - vruig zai om aans niks as wat Hegai, bedainde van keunenk, heur aanroaden haar. Aalmoal dij Ester onder ogen kwam, moggen heur geern lieden.
16 Zo wer Ester bie keunenk brocht in zien keunenkliek pelaais, in tiende moand, dat is nou moand tebet, in t zeuvende joar dat hai regaaierde.
17 Keunenk ging van ale vraauwen t mainste van Ester holden. Zai kreeg van hom meer genegenhaid en laifde as ale aander wichter. Doarom zette hai heur keunenkskroon op kop en verhoogde heur tot keunegin in stee van Wasti.
18 Dou richtte keunenk n groot feestmoal aan veur aal zien vorsten en bedaindes, t Feestmoal van Ester. Hai gaf gewesten vrijdom van belasten en dailde geschenken oet noar men van n keunenk verwachten mog.
19 Der werden vannijs jonge wichter bie nkander brocht. In tied zat Mordechai bie keunenk in poort.
20 Ester haar heur ofkomst en heur volk nait bekendmoakt zo as Mordechai heur instoekt haar, want Ester huil zok aan wat Mordechai zee, net as dou zai bie hom grootbrocht wer.
21 In dij doagen, dou Mordechai in keunenk zien poort zat, werden Bigtan en Teres, twij hofdainders van keunenk dij wacht holden mozzen bie deur, slim vergrèld. Zai perbaaierden keunenk Ahasveros om haals te brengen.
22 Mordechai wer t gewoar en hai vertelde t aan keunegin. Ester vertelde t aan keunenk, oet noam van Mordechai.
23 Zoak wer oetzöcht en t bleek zo te wezen. Baaident werden op n poal regen en t wer in keunenks tegenwoordeghaid opschreven in kronieken.
|
