Ester 03
01Noa verloop van tied muik keunenk Ahasveros van Haman, dij n zeun van Hammedata was en n noazoat van Agag, n vernoam man. Hai verhoogde hom in aanzain en zette zien stoul hoger hèn as dij van ale vorsten dij om hom tou wazzen.
02Ale knechten van keunenk dij bie hom in poort wazzen, bogen veur Haman en wazzen hom onderdoaneg, omdat keunenk dat veurschreven haar. Mor Mordechai boog nait en was nait onderdoaneg.
03Dou zeden hofdainders van keunenk dij in poort wazzen, tegen Mordechai: "Woarom overtreed ie t gebod van keunenk?"
04Dou ze t ale doagen tegen hom zeden en hai nait noar heur heurde, kwam t ter van dat zai Haman op hoogte brochten. Want ze wollen der achter kommen hou Mordechai dat ofgoan zol. Hai haar heur ja te verstoan geven dat hai n Jeud was.
05Dou Haman zag dat Mordechai nait veur hom boog en hom nait onderdoaneg was, wer hai rondom vergrèld.
06Mor hai von t te min om bloots Mordechai dood te moaken, want men haar hom waiten loaten tou wat volk of Mordechai heurde. Doarom wol Haman perbaaiern om ale Jeuden, t volk van Mordechai, oet te reuden in t haile keunenkriek van Ahasveros.
07In eerste moand, moand nisan, in t twaalfde joar van keunenk Ahasveros, wer, doar Haman bie was, t poer gooid veur ale doagen en veur ale moanden, tot aan twaalfde tou, moand adar.
08Dou zee Haman tegen keunenk Ahasveros: "Der is ain volk dat verspraaid en ofzunderd leeft maank volken in ale gewesten van joen keunenkriek. t Het aander wetten as dij volken en holdt zok nait aan wetten van keunenk. t Paast keunenk nait om dat volk geworden te loaten.
09As t keunenk goud tou liekt zol der n lastbraif oetgoan mouten om heur oet te reuden. Den zel ik tiendoezend talent zulver ofwegen en ofdroagen aan dij over schatkist van keunenk goan."
10 Keunenk trok zegelring van haand en gaf dij aan Haman, zeun van Hammedata en noazoat van Agag, de jeudenhoater.
11 "t Zulver mag ie holden," zee e tegen Haman, "en mit t volk mag ie doun wat ie willen."
12 Zo werden op dattiende dag van eerste moand keunenk zien schrievers oproupen en haildaal overainkomsteg Haman zien gebod wer der n schrieven richt aan stadholders van keunenk, aan landvoogden van ale gewesten en vorsten van ale volken, noar ale gewesten in heur aigen schrift en noar ale volken in heur aigen toal. t Wer schreven in noam van keunenk Ahasveros en verzegeld mit zegelring van keunenk.
13 Braiven werden mit bodes noar ale gewesten van keunenk stuurd, mit bosschop dat men ale Jeuden ombrengen, doodmoaken en oetreuden mos, jongen en olden, alderdeegs kinder en vraauwlu, op ain dag op n dattienden van twaalfde moand, moand adar, en dat men zok heur bezittens touaigen mos.
14 Wat in dij braif ston mos in ale gewesten wet worden en aan ale volken kundeg moakt worden om der op dij dag kloar veur te wezen.
15 Kop over haals raaisden bodes òf op bevel van keunenk en wet wer ofkundegd in börg Susa. En in tied dat keunenk en Haman rusteg zitten gingen om te drinken, kwam haile stad Susa in opschudden.
|
