Ester 09
01Op dattiende dag van twaalfde moand, moand adar, dou woord en wet van keunenk in doaden omzet worden zollen, op dag doar vijanden van Jeuden van hoopt haren dat zai heur der onder kriegen zollen, mor t krekt aansom ging, en t n dag wer dat Jeuden boas werden over dij, dij heur hoatten,
02op dij dag kwammen Jeuden bie mekoar in heur steden in ale gewesten van keunenk Ahasveros om dijent om te brengen dij op heur onhaail oet wazzen. Gainain kon standholden tegen heur, want schrik veur heur haar ale volken te pakken.
03Ale bestuurders van pervinzies, stadholders, landvoogden en amtenoars van keunenk kozen kaant van Jeuden, omreden schrik veur Mordechai haar heur te pakken kregen.
04Want Mordechai was n groot man in t pelaais van keunenk en zien foam verbraaidde zok in ale gewesten, hai kreeg aal mor meer te zeggen.
05Mit sweerden richtten Jeuden n slachten aan maank heur vijanden en brochten dood en verdaarf, mit dij heur hoatten deden ze wat ze wollen.
06In börg van Susa hebben Jeuden viefhonderd man doodmoakt en oetreud .
07Ook muiken ze Parsandata dood, mit Dalfon, Aspata,
08Porata, Adalja, Aridata,
09Parmasta, Arisai, Aridai en Waizata,
10 ale tien zeuns van Haman, zeun van Hammedata, dij jeudenhoater. Mor zai kwammen nait aan heur goud.
11 Dou keunenk dij dag heurde houveul dat ter dood kommen wazzen in börg Susa,
12 zee e tegen keunegin Ester: "In börg hebben Jeuden viefhonderd man doodmoakt en oetreud en boetendes de tien zeuns van Haman. Wat zollen ze in aander gewesten van t keunenkriek doan hebben? Wat wil ie wieder nog vroagen? Der zel aan voldoan worden. Wat is joen wèns? t Zel joe geven worden."
13 Doar zee Ester op: "As keunenk t goud tou liekt, loat den Jeuden dij in Susa binnen, toustoan worden om te doun noar wet dij geldt veur vandoag en loat liggoamen van tien zeuns van Haman op n poal spietsen."
14 Keunenk gaf odders dat t zo wezen zol en der wer n wet van kracht, en liggoamen van tien zeuns van Haman werden spietst.
15 Dat dou kwammen Jeuden ook op vattiende dag van adarmoand bie nkander en zai muiken drijhonderd man dood in Susa, mor aan heur goud kwammen zai nait.
16-17 Aander Jeuden in gewesten van keunenk verzoamelden zok ook. Zai verdedegden zok om mit rust loaten te worden deur heur vijanden. Op dattiende dag van adarmoand muiken zai vievenseuventegdoezend man dood van heur vijanden, mor aan heur goud kwammen zai nait. Op n vattienden rustten zai oet en zai muiken doar n dag van mit feestmoal en bliedschop.
18 Mor Jeuden in Susa verzoamelden zok op n dattienden en op n vattienden van dij moand. Zai rustten op vieftiende dag en muiken der n dag van mit feestmoal en bliedschop.
19 Doarom vieren Jeuden op t laand, dij nait in ommuurde steden wonen, vattiende dag van moand adar as n dag van bliedschop en feestmoal en as n dag dat men nkander wat geft.
20 Mordechai schreef ales op wat der veurvalen was en stuurde braiven aan ale Jeuden, dichtbie en vèr vot, in ale gewesten van keunenk Ahasveros,
21 om heur op te leggen om ale joaren n vattienden en n vieftienden van moand adar te vieren,
22 omdat dit doagen wazzen dat Jeuden mit rust loaten werden deur heur vijanden en omdat dit moand was dij veur heur veraanderde van verdrait in bliedschop en van raauw in n feestdag en om dizze doagen tot doagen van feestmoal en bliedschop te moaken, doagen dat men nkander wat toustuurt en aarme lu bedenkt.
23 Jeuden hebben t as veurschrift aanveerd; zai deden aal wat Mordechai heur schreven haar.
24 Haman, zeun van Hammedata, noazoat van Agag, dij jeudenhoater, haar t ja in t zin had om Jeuden oet te reuden en hai haar t poer gooid, dat is t löt, om heur om te brengen en oet te reuden.
25 Mor dou Ester bie keunenk kommen was, schreef dij t bevel dat t minne plan dat Haman tegen Jeuden beroamd haar op zien aigen kop deelkommen mos. En hai en zien zeuns binnen op n poal spietst.
26 Doarom nuimt men dizze doagen Poerim, noar t woord poer.
Hierom, en om wat ter aalmoal in braif van Mordechai ston en om wat zai mitmoakt haren en heur overkommen was,
27 bepoalden Jeuden en aanveerdden zai as veurschrift veur zokzulm en veur heur noageslacht en veur elkenain dij zok bie heur aansloeten zol, dat zai zunder mekaaiern ale joaren dizze baaide doagen vieren zollen zo as heur veurschreven was en op tied dij der veur steld was,
28 en ook dat herdenken en vieren van dizze doagen in ale geslachten, in ale gezinnen en in ale steden wezen zol, om dizze Poerimdoagen nait bie Jeuden in onbruuk roaken te loaten en herinnern bie t noageslacht nait verkommern te loaten.
29 Keunegin Ester, dochter van Abichaïl, schreef soamen mit Jeud Mordechai n twijde braif over Poerim om dizze zoveul meugelk gewicht te geven.
30 Hai stuurde braiven aan ale Jeuden in ale honderdzeuventwinneg gewesten van Ahasveros zien riek, mit zegenwensken en woorden van verbondenhaid.
31 Doar ston in dat men dizze Poerimdoagen op bepoalde doagen vieren mos zo as Jeud Mordechai en keunegin Ester veur heur bepoald haren en zo as zai veur zokzulm en veur heur noageslacht tieden van vasten en van weekloagen bepoald haren.
32 t Veurschrift van Ester doar ze regels van t Poerimfeest in vastlegde, wer in n bouk optaikend.
|
