Ester 01
01In doagen van Ahasveros (aigenste Ahasveros dij regaaierde over honderdzeuventwinneg gewesten, van India òf tot aan Nubië tou),
02in dij doagen, dou keunenk Ahasveros op zien keunenklieke troon zat in börg Susa,
03richtte hai, t was in t daarde joar dat hai regaaierde, n feestmoal aan veur aal zien vorsten en knechten. t Leger van Perzië en Medië, ale lu van hoge komòf en vorsten van gewesten wazzen bie hom,
04dou hai grode riekdom van zien keunenkschop teunde en aal zien pracht en proal - dag in dag oet, honderdtachteg doagen laank.
05Dou dij doagen om wazzen richtte keunenk in boetenhof bie t keunenkliek pelaais n feestmoal aan van zeuven doagen veur aal t volk van hoog tot leeg dat in börg Susa touhuil. t Feest wer holden in binnenhof in toen van t pelaais.
06Linnen en wollen blaauwsangen gedienen wazzen deur trezzen van linnen en roodsangen droad mit zulvern knoppen vastmoakt aan witmaarmern zoelen, golden en zulvern rustbèrren stonden op n vlouer van albast, witmaarmer, peerlmoer en kostboare stainen.
07Om oet te drinken wazzen der golden bekers, gain twij geliek, en der was zat keunenklieke wien, noar men van n keunenk verwachten kon.
08t Drinken ging noar regel van gain dwang. Keunenk haar overstes van zien pelaais goud instoekt dat men doun zol as elk loende.
09Keunegin Wasti richtte ook n feestmoal aan veur vraauwlu, in t pelaais van keunenk Ahasveros.
10 Op zeuvende dag, dou keunenk wat doeneg was van wien, zee hai tegen Mehuman, Bizzeta, Charbona, Bigta, Abagta, Zetar en Karkas - de zeuven noaste hofdainders van keunenk Ahasveros -
11 dat zai mozzen keunegin Wasti, mit keunenklieke kroon op, bie hom brengen om volken en vorsten zain te loaten hou mooi of zai was. Zai mog heur ja wel zain loaten.
12 Mor dou t bevel van keunenk deur hofdainders aan heur overbrocht was, waaigerde keunegin Wasti om te kommen. Keunenk wer hoagels, joa, hai was glìn.
13 Dou pruit keunenk mit wiezen dij kennes haren van wet en recht. t Was ja gewoonte om zoaken van keunenk veur te leggen aan ale wet- en rechtsgeleerden.
14 Dij hai t mainst vertraauwde, wazzen Karsena, Setar, Admata, Tarsis, Meres, Marsena en Memuchan, zeuven vorsten van Perzië en Medië, hoogsten in t riek.
15 Hai vruig: "Wat mout volgens t recht gebeuren mit keunegin Wasti? Zai het bevel van keunenk Ahasveros dat hovelingen overbrocht hebben, ja noast zok deellegd."
16 Memuchan zee, doar keunenk en vorsten bie wazzen: "Keunegin het zok nait bloots tegen keunenk over misdroagen, mor ook tegenover ale vorsten en volken in ale gewesten van keunenk Ahasveros.
17 Wat keunegin doan het, zel ja bie ale vraauwlu bekend worden, van dij gevolgen dat zai heur mannen niks meer in reken hebben zellen as ze zeggen: 'Keunenk Ahasveros het bevel geven om keunegin Wasti bie hom te brengen, mor zai kwam nait.'
18 Vandoag nog zellen vorstinnen van Perzië en Medië, dij vernemen wat keunegin doan het, tegen keunenk zien vorsten net zo proaten, en dat wordt balstureghaid en grammiedeghaid zunder èn.
19 As keunenk t goud tou liekt zol der n keunenkliek bevel oetgoan mouten, opnomen in wetten van Perzen en Meden dat men t nait herroupen kin, dat Wasti nait weer bie keunenk Ahasveros kommen mag. Keunenk zol n aander vraauw stee van keunegin geven mouten, ain dij beter is as zai.
20 As keunenk zo verordonnaaiert en men heurt dat in t haile riek - en groot is t zekerwoar - den zellen ale vraauwen heur mannen, van hoog tou leeg, mit respekt behandeln."
21 Mit dit veurstel wazzen keunenk en vorsten t ains en keunenk dee noar Memuchan zien zeggen.
22 Hai stuurde braiven noar ale gewesten van keunenk, noar elk gewest in aigen schrift en noar ale volken in heur aigen toal, dat elke man boas wezen zol in zien hoes en spreken zol in toal van zien volk.
|
