Handelingen van apostels 06
01In dij tied wer t getal leerlingen aal groder. Dou kreeg je dit, dat dij Grieks spraken, begunden te mòtjen tegen dij Hebreeuws pruiten, omreden heur wedevraauwen werden bie doagelkse verzörgen oversloagen.
02De twaalm raipen ale leerlingen bie nkander. "t Gaait nait aan," zeden ze, "dat wie t verkundegen van God zien woord verwoarlozen om veur t etendrinken zörgen te mouten.
03Kiek es oet, bruiers, noar zeuven manlu maank joe dij goud bekendstoan. Dij van Gaist zoveul wieshaid kregen hebben dat wie ze veur dizze dainst aanstellen kinnen.
04Den kin wie ons haildaal bemuien mit t beden en verkundegen van t woord."
05Aalmoal vonden ze dit n goud veurstel. Ze kozen Stefanus, n man dij van hillege Gaist veul geleuf kregen haar, Filippus, Prochorus, Nikanor, Timon, Parmenas en Nikolaüs oet Antiochië, ain dij t geleuf van Jeuden aannomen haar.
06Dizzent stelden ze veur aan apostels. Dij legden heur handen op, noadat ze beden haren.
07God zien woord wer aal meer bekend en t getal leerlingen in Jeruzalem wer aal groder. Ook n haile bult priesters ging over tou geleuf.
08Dij Stefanus nou, begenoadegd mit veul kracht, dee grode wonders en taikens maank t volk.
09Paardie lu dij bie sinagoge van Libertijnen, Cyreniërs en Alexandrijnen heurden en van Jeuden oet Cilicië en Asia, begunden mit Stefanus te kifken.
10 Mor zai konden nait op tegen wieshaid en Gaist doar of hai mit spreken dee.
11 Dou stuupten ze manlu in, ze zollen zeggen: "Hai haar lasterlieke toal over Mozes en alderdeegs over God. Wie hebben t zulm heurd!"
12 Ze steukelden t volk op en ook oldsten en schriftgeleerden. Ze kwammen op hom ofzetten, pakten hom op en brochten hom veur t Sanhedrin.
13 Doar luiten ze vaalze getugen kommen dij beweerden: "Dij kerel holdt nait op lasterlieke dingen te zeggen van dizze haailege tempel en van wet.
14 Wie hebben hom zeggen heurd: 'Dij Jezus oet Nazaret zel dizze tempel ofbreken en gebruken veraandern dij Mozes ons overleverd het.'"
15 Ale leden van t Sanhedrin zagen dou ze stief noar hom keken, dat zien gezicht net leek op dat van n engel.
|