Job 33
01Nou den, Job, luster noar mien woorden,
knup die goud in oren wat ik aalmoal te zeggen heb.
02Let op, ik dou mien mond open,
woorden liggen mie op tipke van tong.
03Ze kommen mie recht oet t haart,
k zel liekoet zeggen hou of k ter over denk.
04Gaist van God het mie moakt,
oam van Aalmachtege dut mie leven.
05Geef mie beschaaid astoe kinst,
zet die schrap en goa tegen mie in.
06Dou der denk om: doe en ik binnen veur God geliek,
doe bist net as ik, moakt van n klaaikloet.
07Moak die mor nait benaauwd,
k zel die t nait stoer moaken.
08Joa, k ston der bie doustoe zeest
- en ik heur die t nog zeggen -:
09'Ik bin onschuldeg, k heb niks misdoan,
ik bin zuver, k heb gain schuld.
10 Toch het God n reden vonden om mie aan te pakken,
hai behandelt mie as zien vijand.
11 Hai zet mie vouten in t blok,
hai gaait aal mien gangen noa.'
12 Mor doe hest t mis, dat kin k die wel vertellen:
God staait ja vèr boven n mensk.
13 Woarom moakst hom verwieten,
woarom zegstoe: 'Hai zegt niks weerom as ain t tegen hom het'?
14 God zegt wel degelk wat weerom, op meer as ain menaaier,
mor gainain dij der acht op geft.
15 In dreumen, in viziounen bie naacht,
as mensken daip in sloap binnen,
of as ze op bèr liggen te doddern,
16 den flustert hai mensken wat in t oor,
of let heur schrikken - n nachtmerrie,
17 om heur òf te holden van minne doaden,
om heur veur grootseghaid te bewoaren.
18 Hai redt hom van t graf
en oversteek van doodsrevier.
19 n Aander leert zien les as e mit kripsie op bèr te liggen komt
en zien liggoam aalaan vecht tegen koors.
20 Eten schudt e zok veur,
al is t ook zien lekkerste kost.
21 Zien liggoam teert vot doar je bie stoan,
vèl over bonk, nait om aan te zain.
22 Hai staait al mit ain bain in t graf,
is op staarven noa dood.
23 Mor as ter ain is dij veur hom opkomt,
ain van God zien doezenden engels,
om hom weer op t rechte pad te brengen,
24 en as God hom den genoadeg is en zegt:
'Loat hom lopen, loat hom nait in t graf terecht kommen,
hai het genog leergeld betoald,'
25 den wordt e weer jonk en staark,
hai komt in zien twijde jeugd.
26 Hai kin weer beden tou God en dij is hom tougedoan,
vol bliedschop kin e hom onder ogen kommen,
God het hom zien welwezen weeromgeven.
27 Den zingt e t oet en zegt tegen elk:
'k Haar zundegd en verkeerd doan,
mor hai het mie t nait aanrekend.
28 Hai het mie red van t graf,
ik mag leven en t licht weer zain.'
29 Joa wis, dat aalmoal dut God,
aal mor weer dut e dat veur n mensk:
30 hai hoalt hom bie t graf vandoan,
zien levent krigt weer glaans.
31 Luster goud, Job! Heur mie aan,
hol die even stil en loat mie mien verhoal doun.
32 Astoe den wat te zeggen hest, kom der mit veurndag,
zeg t gerust - ik geef die geern geliek.
33 Mor astoe niks te zeggen waist, luster den noar mie,
hol die stil en loat mie die t den mor vertellen."
|