Exodus 25
01Dou zee de HEER tegen Mozes:
02"Vroag aan Isrelieten, om n biedroage veur mie òf te stoan. Van elk dij dat van haarten dut, mostoe zo'n ovver veur mie aannemen.
03Biedroagen dijstoe van heur aannemen most, binnen: gold, zulver en brons,
04en geliekegoud blaauwsangen, roodsangen en helderrode wol, fienweefd linnen en segehoar,
05roodvaarfde schoapevellen, fien leer en acaciaholt,
06en wieder eulie veur lampen, kruderij veur zaalfeulie en lekker roekende wierook,
07onixstainen en aander jewailen veur t priesterklaid en bòrsttaas.
08Wieder mouten Isrelieten n tabbernoakel veur mie oprichten, n haaileg hoes, den kin ik middenmaank joe wonen.
09Bie t moaken van dat haailegdom en aal wat doarin heurt, mout ie joe holden aan t model dat ik die zain loaten zel.
10 Ie mouten mie n aark, n verbondskist, moaken van acaciaholt, mit n lengte van twijenhaalf èl, n brette van anderhaalf èl en ook n högte van anderhaalf èl.
11 Vanbinnen en vanboeten mout ie dij mit zuver gold besloagen en der n golden liest boetenomtou moaken.
12 Den mout ie vaaier golden ringen gaiten en dij vastzetten op ale vaaier houken, zodat ter aan baaide laange zieden twij ringen oetsteken.
13 Moak joe den twij droagbomen van acaciaholt, besloag dij mit gold
14 en steek dij bomen aan weerszieden deur dij ringen hèn, zo kin ie d'aark droagen.
15 Dij droagbomen mouten in ringen van aark zitten blieven en maggen der nait oethoald worden.
16 Den mostoe in d'aark wetsveurschriften leggen, dij ik die geven zel as taiken van ons verbond.
17 Wieder mout ie n deksel van zuver gold moaken, mit n lengte van twijenhaalf èl en n brette van anderhaalf èl.
18 Veur baaide ènden van dij deksel mouten twij engelfiguren van gedreven zuver gold moakt worden,
19 dij tegen nkander over stoan as ain gehail mit deksel.
20 Dij engels mouten heur vleugels oetspraaiden over deksel hèn en mit gezicht noar nkander tou noar deksel kieken.
21 Ie mouten wetsveurschriften dij ik die geven zel, in d'aark leggen en den mout deksel der op.
22 Doar zel ik bie die kommen, boven op dat deksel tussen baaide engels in. Doar zel ik die vertellen aal wat ik d'Isrelieten opdroagen zel.
23 Wieder mout ie n toavel van acaciaholt moaken, twij èl laank, ain èl braid en mit n högte van anderhaalf èl.
24 Dij mout ie mit zuver gold besloagen en der n golden liest rondomtou moaken.
25 Boetendes mout ie n raand van n handbraid om toavel tou moaken, ook weer mit n golden liest.
26 Der mouten ook vaaier golden ringen aan vastmoakt worden, op aal vaaier houken bie de poten.
27 Dij ringen mouten zo aan toavel vastmoakt worden dat droagbomen doar deurhènstoken worden kinnen om doar toavel mit op te tillen.
28 Dij droagbomen mout ie ook weer van acaciaholt moaken en mit gold besloagen.
29 Wieder mout ie veur t ovvern schuddels en schoalen, kannen en kommen moaken, ales van zuver gold.
30 En op dij toavel mout ie hailtied weer broden veur mie hènleggen.
31 Ie mouten mie ook n stoande luchter van zuver gold moaken. Dij luchter mout van gedreven waark wezen, mit vout en schacht oet ain stok, en mit kelken, knoppen en bloumen.
32 Der mouten zès aarms opzied tou schacht oetsteken, aan weerskanten drij.
33 Oet elke aarm mouten drij bloumkelken dreven worden, mit knoppen en bloumen net as bie mandelblui, aalmoal op zulfde menaaier.
34 Aan luchterschacht mouten ook vaaier bloumkelken moakt worden mit knoppen en bloumen, ook weer net as bie mandelblui.
35 Op elk stee doar twij aarms tou schacht oetkommen, mouten knoppen zitten, drij boven nkander.
36 Knoppen en aarms mouten ain gehail wezen mit luchterschacht, ain stok gedreven zuver gold.
37 Moak ter zeuven eulielampen veur en zet dij zo op luchter dat t licht noar veuren schient.
38 Ook snuters en dovers mouten van zuver gold wezen.
39 Veur de haile luchter mout ie n hail talent gold broeken.
40 En zörg der veur dat ie hom moaken noar t model dat ik die op baarg zain loaten heb.
|
