Exodus 23
01Breng gain leugenproat bie t pad. Ain dij kwoad dut, mag ie nait helpen, aans doun ie der zulm aan mit.
02Ook as mainste mensken kwoad willen, huif ie doarom nog nait mit heur mit te doun. En as ie getugen mouten veur t gerecht, richt joe den nait noar aal dij lu dij t recht krom moaken willen.
03Bie n rechtszoak mag ie n aarme man nait veurtrekken.
04As ie n löslopende os of ezel tegenkommen van ain doar ie n hekel aan hebben, mout ie hom t daaier toch weerombrengen.
05As ie d'ezel van ain doar ie roezie mit hebben zowat onder zien vracht in nkander zakken zain, help hom den gaauw in t èn: ie maggen dij man ja nait aanknooien loaten.
06Bie n rechtszoak van n aarme man mag ie zien recht nait omboegen.
07Woar joe veur oneerleke zoaken. n Eerlek en rechtschoapen man mag ie nait ombrengen, want den zel ik joe dat zeker aanreken.
08Ie maggen gain giften en goaven aanpakken, want den zai ie nait meer wat recht is en verlust n eerlek man zien rechtszoak.
09n Vremde in joen laand mag ie nait min behandeln. Ie waiten ja hou zo ain zok vuilt, omreden ie hebben zulm vremden west in Egypte.
10 Zès joar achternkander mag ie joen laand beaarbaiden en vruchten der van inhoalen.
11 Mor in t zeuvende joar mout ie t broak liggen loaten, den kin t laand tot rust kommen. Wat ter den nog opkomt, is veur aarmelu, en wat doarvan overblift is veur t wild. Mit joen droevetoen en joen olievehof mout ie net zo doun.
12 In zès doagen mout ie aal joen waark doun, mor op zeuvende dag mout ie oetrusten. Zodat joen os en joen ezel ook oetrusten kinnen, en ook zeun van joen sloavin en t aander lös volk wat op oam kommen kin.
13 Woar joe veur ales doar ik joe veur woarschaauwd heb. Hol joe der gain aandere goden op noa, alderdeegs heur noam mag ie nait in mond nemen.
14 Drij moal in t joar mout ie feestvieren veur mie.
15 Eerst vier ie t feest van t Ongerezen brood, in abibmoand, moand doarin ie tou Egypte oettrokken binnen. Zeuven doag laank zel ie t brood zunder zoere daig eten, zo as ik joe dou besteld heb. En kom nooit mit lege handen om mie te vereren.
16 Den t feest van t Inhoalen, as d'eerste vruchten van joen zaai- en pootgoud van t laand kommen. En as leste t feest van de oogst aan t èn van t joar, as aal joen vruchten onderdak binnen.
17 Drijmoal in t joar mouten zodounde aal joen manlu veur mie, de HEER, de Alderhoogste, verschienen.
18 t Bloud van t ovverbaist mag nait tougelieks mit rezen brood aan mie opdroagen worden. En t vet van t feestovver mag ie nait veur aanderdoagsmörgens overholden.
19 De beste vruchten van d'eerste oogst mout ie noar t hoes van de HEER brengen.
En kook n segebokje nait in t melk van zien moeke.
20 Ik stuur n engel veur joe aan om onderwegens op joe te pazen. Dij zel joe op t stee brengen dat ik veur joe bestemd heb.
21 Wees op hom verdocht, dou wat hai zegt en goa nait tegen hom in, dat zol hai joe nait vergeven. Ik bin ja zulm in hom aanwezeg.
22 As ie goud noar hom lustern en persies doun wat ik joe zeg, den zel ik de vijand van joen vijanden wezen en tegenstander van joen tegenstanders.
23 Den zel mien engel veur joe aan goan. Dij zel joe noar t laand brengen doar de Amorieten, de Hethieten en de Perizzieten wonen en de Kanaänieten, de Chiwwieten en de Jebusieten, en ik zel niks van heur overloaten.
24 Goa nait veur heur goden op knijen om heur te vereren. Dou nait aan heur gebruken mit, mor goa der tegenin. Breek heur beelden òf en haauw dij aan groezels.
25 Mie mout ie dainen, joen HEER en God. Den zel ik joe zat etendrinken geven en joe woaren veur zaiktes.
26 Den zel der gain vraauw in joen laand wezen dij n miskroam krigt of gain kinder kriegen kin, den zel ik joe n laank levent bezörgen.
27 Angst en benaauwdhaid zel ik veur joe oetsturen. Ale volken doar ie op òf goan, zel ik schrik aanjoagen, ze zellen haildaal verhilderd op loop goan.
28 Ik zel ook peerwepen veur joe oetsturen. Dij zellen de Chiwwieten, de Kanaänieten en de Hethieten veur joe oetjoagen.
29 Ik zel heur nait in ain joar tieds votjoagen, den zol t laand ja ain wildernis worden en t ongedaaierte zol joe de boas worden.
30 Ik zel heur stoadegaan veur joe oetjoagen tot ie mitnkander maans genog worden binnen, dat ie t laand overnemen kinnen.
31 t Laand dat ik joe geef, lopt van Rode Zee tot aan zee doar Filistijnen wonen, en van woestijn tot aan Eufraat. Aal t volk in dat laand geef ik joe in handen: ie kinnen heur zo tou t laand oetjoagen.
32 Ie maggen gain verbond mit heur of mit heur goden aangoan.
33 Loat heur nait in joen laand wonen, dat ze joe nait tot ofgoderij overhoalen kinnen. Dat zol vervaast joen ondergang worden."
|
