Jozua 20
01Dou zee de HEER tegen Jozua:
02"Isrelieten mouten nou dij vluchtsteden aanwiezen, doar ik t al eerder mit Mozes over had heb, dat dij dat tegen joe zeggen zol.
03As ain bie ongelok n aander om t levent brocht het, nait mit opzet, den kin hai doarhèn vluchten. Man dij dood van zien femilielid ainlieks vreken mout, mag hom den niks doun.
04Hai mout as de weerlicht moaken dat e in ain van dij vluchtsteden komt en doar bie stadspoort stoan goan en de oldsten van dij stad persies vertellen wat e doan het. Dij mouten hom permizzie geven om in heur stad te blieven en hom n stee geven doar e wonen kin.
05As man dij zien femilie vreken mout, achter hom heer zit, maggen ze hom nait overlevern. Hai het t ja bie ongelok doan en nait omdat e hom nait lieden mog.
06Den mout e doar wonen blieven totdat e veur t gericht west het. Nait eerder as dat ter n nije hogepriester is omdat de olde sturven is, mag e weeromgoan noar zien aigen stad en zien aigen hoes tou."
07Dou zunderden Isrelieten zès steden òf. Aan westkaant van Jordaan: Kedes in Galilea, in t heuvellaand van Naftali; Sichem in t baarglaand van Efraïm; en Kirjat-Arba , dat is n aander noam veur Hebron, in t baarglaand van Juda.
08En aan aanderkaant Jordaan: Beser in woestijn op hoogvlakte, aan oostkaant van Jericho, in kontrainen van stam Ruben; en Ramot in Gilead in kontrainen van stam Gad; en Golan in kontrainen van stam Manasse.
09Elke Isreliet en ook elke boetenlander dij in Israël woonde, kon noar ain van dizze steden vluchten as hai bie ongelok ain om t leven brocht haar. Den mog dij zien femilie hom niks doun zo laank as hai nait veur t gericht west haar.
|
