Jozua 16
01Zuudgrèns van t laand dat noazoaten van Jozef bie t lötten kregen, begunde aan oostkaant bie Jordaan bie Jericho, ging deur woestijn en den omhoog deur t baarglaand noar Betel.
02Van Betel noar Luz en doarvandoan noar Atarot, in kontraain doar Arkieten wonen.
03Den laip grèns deur t kontraain van Jafletieten, zowat aan Leeg-Bet-Choron tou, en wieder noar stad Gezer. Grèns holdt op bie zee.
04Jozef zien noazoaten, dat is te zeggen stam Manasse en Efraïm, kregen dit aarfdail.
05Dit wazzen grènzen van pervinzie dij Efraïmieten kregen: heur zuudgrèns begunde aan oostkaant van Atrot-Addar en ging noar Hoog-Bet-Choron,
6-8 en doarvandoan noar t westen, aan Middellandse Zee tou.
Noordgrèns begunde bie stad Michmetat, den noar t westen noar stad Tappuach en doarvandoan bie beek Kana langs aan zee tou.
Van Michmetat ging oostgrèns mit n bocht noar t zuden noar stad Taänat-Silo, omdeel noar Janoäch, Atarot, Naära, stoef bie Jericho langs aan Jordaan tou.
Dit wazzen grènzen van t aarfdail van Efraïm.
09Zai kregen der ook nog n stokkewat steden mit heur dörpen bie dij in pervinzie van stam Manasse laggen.
10 Liekewel hebben Efraïmieten Kanaänieten nait votjagd oet Gezer, dat dij wonen doar nog aaltied bie heur. Mor Efraïmieten hebben t aal kloar kregen dat lu van Gezer haard veur heur waarken mouten.
|
Jozua 17
01t Löt het ook oetwezen wat dail van t laand stam Manasse kreeg. Manasse was oldste zeun van Jozef.
Manasse zien oldste zeun Machir, voader van Gilead, was n alderiezelkste vechtersboas en doarom haar hai landstreken Gilead en Basan kregen aan oostkaant Jordaan.
02Aander noazoaten van Manasse kregen bie t lötten laand aan diskaant Jordaan. Dat wazzen Abiëzer, Chelek, Asriël, Sechem, Chefer en Semida, aaltemoal stamvoaders van femilies.
03Ain van heur, Chefer, zeun van Manasse zien klaainzeun Gilead, haar n zeun, Selofchad, dij allenneg dochters haar. Zai haitten Machla, Noä, Chogla, Milka en Tirsa.
04Dizze wichter gingen noar priester Eleazar, Jozua en laaiders van t volk en zeden: "De HEER het tegen Mozes zegd, dat wie net zo goud n aarfdail hebben mouten as manlu van ons stam." Dou gavven ze heur ook n aarfdail, omdat de HEER dat zegd haar.
05Aan noazoaten van Manasse werden zodounde tien laandstreken toupaart, behaalve dij ze al kregen haren aan aanderkaant Jordaan, dat is te zeggen Gilead en Basan.
06Want vraauwlu van stam Manasse kregen net zo goud n aarfdail as manlu. t Laand Gilead was al toupaart aan zien aander noazoaten.
07In t noordwesten swette pervinzie van stam Manasse aan stam Aser. Zuudgrèns ging van Michmetat, dat aan oostkaant van Sichem ligt, noar t zuden tou noar Jasib, dat bie wèlput van Tappuach ligt.
08t Laand om Tappuach tou is van stam Manasse, mor stad Tappuach zulm, dij op grèns ligt, is van Efraïmieten.
09Van Tappuach òf ging zuudgrèns bie heuvels omdeel noar beek Kana en doar bie langs westkaant oet aan zee tou. n Stokkewat steden aan zuudkaant van beek wazzen van Efraïm, mor dij streek doar heurde nog bie pervinzie van Manasse.
10 In t noordwesten swette pervinzie van stam Manasse aan stam Aser, in t noordoosten aan stam Issachar.
11 In t laand van dizze baaide stammen haar Manasse boetendes nog verschaaiden steden: Bet-San, Jibleam, Dor, Endor, Taänach en Megiddo, elk mit zien stadjes.
12 Mor lu van Manasse konden Kanaänieten dij in dizze steden woonden, nait boas worden, dat dij bleven doar zunder woord zunder wies in wonen.
13 En of wazzen Isrelieten ook staark genog om heur fiks aan t waark te zetten, votjoagen konden ze heur nait.
|
