Jozua 15
13 De HEER haar tegen Jozua zegd dat hai n stok laand van stam Juda aan Kaleb geven mos. Doarom gaf Jozua hom stad Hebron (Hebron dat was stad van Arba, voader van Enak.)
14 Kaleb juig noazoaten van Enak, zien drij zeuns Sesai, Achiman en Talmai, mit heur volk, tou stad oet en ging der zulm wonen mit zien volk.
15 Doarvandoan ging e op Debir òf, dizze stad haitte dou nog Kirjat-Sefer.
16 Dou zee Kaleb: "Kerel dij Kirjat-Sefer boas worden kin, mag mit mien dochter Achsa traauwen."
17 Zien neef Otniël, zeun van zien bruier Kenaz, kreeg dat kloar en t wicht was zienent.
18 Dou Achsa op heur traauwdag bie Otniël kwam, stuupte zai hom in: "Mos ais heuren! Doe mos mien pa om n stok laand vroagen." Dat dee e. Zai zat op n ezel, klapte in handen en raip: "Pa!" "Joa?" zee Kaleb.
19 Dou zee zai: "Geef mie toch ook wat veur mien traauwen. Laand dat wie van joe kregen hebben, is deurhèn dreug. Geef mie doar wotterputten." Dou gaf Kaleb heur hoog en leegliggende wèllen.
|
