Jozua 10
28 Aigenste dag veroverde Jozua Makkeda. Hai muik aal t volk dood. Ook keunenk, krekt as dij van Jericho.
29 Van Makkeda ging hai mit t haile leger noar Libna tou en dee doar n aanvaal op.
30 De HEER gaf stad en keunenk in handen van Isrelieten. Ze muiken aal t volk dood, ze spoarden gainain. Mit keunenk ging t net as mit dij van Jericho.
31 Van Libna noar Lachis. Stad wer belegerd en aanvaal begunde.
32 Twijde dag van aanvaal gaf de HEER Lachis in handen van Isrelieten. Ze muiken aal t volk dood, net as in Libna.
33 Horam, keunenk van Gezer, perbaaierde nog wel om Lachis te helpen, mor Jozua versluig hom en zien volk. Gainain kon t noavertellen.
34 Van Lachis ging t op Eglon òf. Stad wer belegerd en aanvaal begunde.
35 Aigenste dag veroverden ze stad en muiken aal t volk dood, net as in Lachis.
36 Van Eglon wieder noar Hebron, en ook doar vot weer in aanvaal.
37 Zai veroverden stad en ook aal t volk muiken ze dood, krekt as in Eglon. Haile stad vernailden ze.
38 Dou ging Jozua mit zien leger weerom op Debir òf, en in aanvaal.
39 Hai veroverde Debir en ale steden doar rondomtou dij der bie heurden. Keunenk van Debir en aal t volk muiken ze dood. Gain mensk ontkwam. t Verging heur net as Hebron en Libna en heur keunenks.
40-41 Zo veroverde Jozua t haile laand. Hai versluig ale keunenks in t heuvellaand, in Negev-woestijn, in t Legelaand bie Grode Zee en op oostelke ofloop noar Dode Zee tou. Van Kades-Barnea in t zuden tot aan Gaza tou, en t haile laand Gosen tot aan Gibeon tou in t noorden. Gain mensk is ter overbleven. Zo haar de HEER, Israël zien God, ja zegd dat ze doun mozzen.
42 Jozua het ale keunenks in dij kontrainen in ain raais versloagen. t Was de HEER, God van Israël, ja dij veur heur vocht.
43 Dou ging Jozua mit Isrelieten weerom noar t kaamp tou bie Gilgal.
|