Jozua 03
01Aanderdoagsmörgens wazzen Jozua en ale Isrelieten der vroug bie en raaisden òf van Sittim noar Jordaan tou. Doar bleven ze n poar nachten eer ze overstoken.
02Drij doag noatied deden de laaiders de ronde deur t kaamp.
03Zai zeden tegen t volk: "As ie zain dat priesters aark van t verbond van de HEER, joen God, op scholders pakken, mout ie opbreken en der achterheer goan.
04Mor ie mouten der veur zörgen dat ter tussen joe en aark n ofstand blift van om en bie twijdoezend èl. Dichterbie kommen mag nait. Aark zel joe t pad wiezen, want ie binnen doar nog nooit langs kommen."
05En Jozua zee tegen t volk: "Ie mouten joe nou kloarmoaken. Zörg der veur dat ie goud hemmel en schoon binnen, omreden de HEER zel mörgen n groot wonder doun, doar ie apmoal slim van opkieken zellen."
06Tegen priesters zee Jozua: "Pak verbondsaark op scholders en goa veur t volk aan." Dat deden ze.
07Dou zee de HEER tegen Jozua: "Van vandoag òf aan zel ik zörgen dat t haile volk Israël joe n bult in reken het as laaider. Zai zellen waiten dat ik noast joe stoa net zo as destieds bie Mozes.
08Zeg tegen priesters dij aark droagen: 'As ie bie Jordaan kommen binnen, mout ie in t wotter stoan blieven.'"
09Tegen Isrelieten zee Jozua: "Kom hier heer en luster goud wat de HEER, joen God, zegd het wat of hai doun zel.
10 Den zel ie begriepen dat God dij leeft, bie joe is en dat ie der op aan kinnen dat hai Kanaänieten, Hethieten, Chiwwieten, Perizzieten, Girgasieten, Amorieten en Jebusieten verjoagen zel.
11 Luster goud wat of ik joe zeg: Verbondsaark van de Heer van haile wereld, zel veur joe aan over Jordaan goan.
12 Nou mout ie twaalf manlu oet stammen van Israël kaizen, van elke stam ain.
13 Zo gaauw as priesters dij aark droagen van t verbond van de HEER, dij Heer over haile wereld is, heur vouten in t wotter zetten, zel der gain stroom meer wezen en zel t wotter oet t noorden as n daam stoan blieven."
14 Dou t volk tou t kaamp oet ging om over Jordaan te trekken, was t tied van inhoalen en den staait t wotter aaltied hoger as aans.
15 Priesters gingen veurop mit aark op scholder. Dou dij bie Jordaan kwammen en heur vouten doar in t wotter zetten, was t doan mit stromen.
16 n Hail èn wieder op, bie stad Adam stoef bie Saretan, kwam t wotter in t èn en bleef stoan as n daam. Der stroomde gain wotter meer noar Zoltzee, dij ook wel Dode Zee hait. Dou trok t volk over, tegen Jericho over.
17 Ondertied dat t volk over dreuge boom noar aanderkaant laip, bleven priesters mit aark doar op t dreuge stoan, tot ze der apmoal overhèn wazzen.
|
