Openboaren van Johannes 04
01Doarnoa kreeg k n vizioun: doar ston mie toch n deur open in hemel! En dij eerste stem dij k tegen mie proaten heurd haar, net of t n bezuun was, zee: "Kom boven, hierhèn! Den zel ik die zain loaten wat hiernoa gebeuren mout!"
02Votdoalek kwam de Gaist over mie. En joa man, doar ston n troon in hemel, en op dij troon zat ain.
03Zo te zain was dij net jaspis of carneool. Om troon tou ston n regenboog, van smaragd leek t wel.
04In n kring om troon tou stonden vaaierntwinneg aander tronen, en doarop vaaierntwinneg oldsten, in t wit en mit golden kronen op.
05Oet troon kwam aalaan weerlicht en rommeln en dundern. Veur troon stonden zeuven fakkels te branden. Dat binnen God zien zeuven gaisten.
06Veur troon was zukswat as n gloazen zee, net kristal. Midden veur troon en der rondom heer stonden vaaier leventege wezens, van veuren en van achtern bezaaid mit ogen.
07t Eerste daaiern leek op n laiw, twijde op n jonge bol, daarde haar n menskengezicht en vaaierde leek op n oarend, as dij vlogt.
08Ale vaaier daaiern haren elk zès vleugels. Ze wazzen bezaaid mit ogen: vanondern en vanboven, vanbinnen en vanboeten. Zai holden nait op mit roupen, snaachts nait en overdag ook nait: "Haaileg, haaileg, haaileg, Heer, God, aalbestuurder, dij was, dij is en dij komt!"
09Ieder bòt as dij daaiern lof, eer en daank brengen aan hom dij op troon zit en dij leeft veur aiweg en aaid,
10 valen dij vaaierntwinneg oldsten op knijen veur hom dij op troon zit en aanbeden ze hom dij leeft veur aiweg en aaid. Ze gooien heur kronen veur troon hèn en roupen t oet:
11 "Heer, God van ons, t komt joe tou stoatsie, eer en macht te kriegen, ie hebben t ja altmoal moakt: deurdat ie t wollen, was t ter, schoapen en aal."
|
