Jeremia 46
01Jeremia kreeg dit woord van de HEER aangoande de volken.
02Eerst veur Egypte, over t leger van farao Necho, keunenk van Egypte, dat bie Karkemis aan Eufraat deur keunenk Nebukadnessar van Babylonië versloagen wer. En dat in t vaaierde bestuursjoar van keunenk Jojakim van Juda, zeun van Josia:
03"'Moak t grode en lutje schild ree,
kloarmoaken veur t gevecht!
04Span peerden in, spring op woagens.
In t gelid, helms op,
speren schaarp, harnas aan!'
05Mor wat gebeurt ter nou?
Haildaal verbiesterd trekken ze terog.
t Machtege leger stört in nkander,
t gaait ter vandeur.
Schrik en aalteroatsie overaal!
- godssproak van de HEER.
06Vlogste man kin nait oetkniepen,
moudegste kerel nait ontkommen.
In t noorden, bie Eufraat,
strovveln ze en valen der bie deel.
07Wèl komt doar aanrollen as de Nijl,
as n stroom dij aanbroezen komt?
08Egypte komt ter aanrollen as de Nijl,
as n stroom dij aanbroezen komt.
'Doar kom k aan,' ropt e,
'ik zel eerde onderlopen loaten,
steden en inwoners verrinnewaaiern.
09Vot, peerden! Woagens, veuroet!
Soldoaten, der op lös:
manlu oet Nubië en Libië, schild in haand,
boog in aanslag, manlu oet Lydië!'
10 Mor dizze dag is dag van de HEER,
de God van de machten,
n dag van vroak, van vroak op zien vijanden.
t Sweerd verslindt ales, totdat e zat is,
zok doen dronken het aan heur bloud.
Want de HEER, de God van de machten,
slacht ze altmoal òf,
in t noorden, bie de Eufraat!
11 Goa noar Gilead tou, hoal baalzem op,
jonkvraauw Egypte.
Aal joen zaalf helpt nait,
joen wonden willen nait betern.
12 De volken hebben joen roupen heurd,
haile wereld over klinkt joen kloagen,
aine soldoat strovvelt over aander,
en aalbaaident valen ze deel."
13 Jeremia kreeg dit woord van de HEER dou keunenk Nebukadnessar van Babel optrok tegen Egypte:
14 "Rappetaaier t in Egypte,
geef t deur in Migdol,
in Memfis en Dafne:
'In t gelid! Zet joe schrap!
t Sweerd verslindt ales om joe tou!'
15 Woarom binnen joen staarke soldoaten der vandeur goan,
woarom huilen ze gain stand?
Omreden de HEER het heur oftroeveld,
16 ze strovvelden en vuilen deel.
Dou zeden ze tegen nkander:
'Wie goan weerom noar ons aigen volk,
noar t laand doar wie geboorteg binnen,
dat we ontkommen aan t moordende sweerd!'
17 Tegen farao, keunenk van Egypte, zeden ze:
'Proatjeboksem, dij zien kaans schaiten let.'
18 Zo woar as ik leef - godssproak van keunenk,
HEER van de machten is zien noam -
zo as de Tabor oetstekt boven baargen,
en de Karmel, hoog boven zee,
zo komt e der aan.
19 Moak ales kloar veur oettocht,
bewoners van Egypte,
want Memfis wordt n wildernis,
n puunbult zunder bewoners.
20 Egypte leek op n mooi veerske,
doar bremsters oet t noorden op ofvlaigen.
21 Zien huursoldoaten binnen net vedde kaalver,
mor ook zai luiten hakken zain.
Ze gingen der vandeur,
ze konden t nait holden,
want aanbroken is ongeloksdag,
tied veur heur straf is ter heer.
22 Egypte kropt terog
sisternd as n slaang,
nou legers der tegen oprukken.
Mit bielen in aanslag
kommen holthakkers opzetten.
23 Al lieken de bozzen nait deur te kommen,
ze haauwen heur om - godssproak van de HEER.
Talrieker binnen ze as sprinkhoanen,
der is gain tellen aan.
24 Zo wordt Egypte vernederd,
onder vout lopen deur n volk oet t noorden.
25 Dit zegt de HEER van de machten, de God van Israël: Ik zel Amon stravven, en Thebe, zien god, Egypte mit zien goden en keunenks, farao en dij in hom vertraauw hebben.
26 Ik lever heur oet aan dij heur noar t levent stoan, aan keunenk Nebukadnessar van Babylonië en zien ofsieren. Mor loater zel Egypte weer leven as in laankmanstieden - godssproak van de HEER.
27 Wees doarom nait benaauwd, Jakob mien knecht,
wees nait baang, Israël,
ik verlös joe en joen kinder
oet t ofgelegen laand van heur gevangenschop.
Den woont Jakob weer vredeg en vaaileg,
zunder dat ain hom opjagt.
28 Wees doarom nait benaauwd, Jakob mien knecht,
want ik bin bie joe
- godssproak van de HEER.
Ik reken òf mit ale volken
doar ik joe onder verstreud heb;
mor mit joe dou ik dat nait.
Ik straf joe aal, zo as ie dat verdainen,
vrijoet loat ik joe nait goan!"
|
