Jeremia 30
01Jeremia kreeg dit woord van de HEER:
02"Dit zegt de HEER, Israëls God: Most ales wat ik tegen die zegd heb, opschrieven.
03Want der komt n tied dat ik n keer breng in t löt van mien volk Israël en Juda, zegt de HEER, en heur weerombreng noar t laand dat ik heur veurolden in aigendom geven heb - godssproak van de HEER."
04Dit het de HEER zegd tegen Israël en Juda:
05Dit zegt de HEER:
Ik heur geroup van benaauwdens,
schrik holdt ter tou en gain vree.
06Vroag mor ais noa:
het n manspersoon ooit kinder kregen?
Woarom zai ik ze den altmoal stoan
mit handen in zied as n vraauw in heur vloagen?
Woarom binnen ze zo doodsblaik om t gezicht?
07O wai! Dit is grode dag,
gain aander liekt ter op.
n Benaauwde tied is t veur Jakob,
mor hai komt ter goud deurhèn.
08Dij dag pak ik heur t juk van nek òf en breek ik heur kettens
- godssproak van de HEER van de machten.
Zai huiven nait meer onder vremden te zitten,
09de HEER, heur God, zellen ze dainen
en David, keunenk dij ik over heur aansteld heb.
10 Wees zodounde nait benaauwd, Jakob mien knecht,
wees mor nait baang, Israël - godssproak van de HEER.
Ik verlös joe en joen kinder oet n ofgelegen laand,
doar ze vaast zitten.
Den woont Jakob weer vaaileg en rusteg,
zunder dat ain hom opjagt.
11 Want ik bin bie joe om joe te redden
- godssproak van de HEER.
Mit ale volken doar ik joe onder verspraaid heb,
reken ik òf, veurgoud,
mor nait mit joe.
Ik straf joe aal zo as ie dat verdainen,
vrijoet loat ik joe nait goan.
12 Dit zegt de HEER:
Joen kwoal is nait te genezen,
aan joen wonden is gain zaalf te strieken.
13 Gainain verzörgt joen swèllen,
joen wonden willen nait dicht.
14 Aal dij gek op joe wazzen, hebben joe vergeten,
ze lopen joe nait meer achternoa.
Sloagen heb ik joe ja, zo as n vijand slagt,
ongenoadeg heb ik joe ofstraft,
om aal joen misdoaden,
joen mennegte zunden.
15 Woarom jammer ie den om joen wonden,
om joen pien, nait meer te droagen?
Om aal joen misdoaden
om joen zunden, nait te tellen,
heb ik joe dit altmoal aandoan.
16 Ik verzeker joe: dij joe verslindt, wordt zulm verslonden,
aal joen vijanden worden zulm gevangennomen,
dij joe plundern worden zulm plunderd,
dij joe berooft, loat ik beroven.
17 Ik moak joen wonden dicht
en moak joen kwoalen beter
- godssproak van de HEER -,
ook al nuimt men joe Verschoppeling,
zegt men: 'Noar Sion kiek we nait meer om.'
18 Dit zegt de HEER:
Ik keer t löt van Jakobs tènten
en ontfaarm mie om zien wonerij.
Op zien puunbulten wordt stad vannijs baauwd,
börg komt weer op ol stee te stoan.
19 n Loflaid klinkt,
men schoddert weer van t lagen.
Ik dou heur aanwinnen,
nooit meer krimpen ze in.
Tou aanzain breng ik heur,
gainent kikt meer op heur deel.
20 Heur zeuns zellen veur mie wezen zo as ze vrouger wazzen,
altmoal mit nkander blieven ze bestoan, veur aaid.
Dij heur der onder holden, zel ik ofstravven.
21 Zien keunenk is ain van heur,
oet aigen midden komt zien heerser.
Ik loat hom bie mie kommen,
hai mag veur mie verschienen.
Want wèl aans zol t woagen,
zol zien levent op t spul zetten,
deur mor zo op mie tou te kommen?
- godssproak van de HEER.
22 Ie zellen mien volk wezen
en ik joen God.
23 Störm van de HEER stekt op,
n dikke dunderbui brekt lös
op kop van deugennaiten.
24 Kwoadens van de HEER komt nait tou bedoaren,
veurdat hai oetvoerd het aal wat hai van plan was.
Loater zel joe dit kloar worden.
|
