Jeremia 26
01In t begun van t bestuur van keunenk Jojakim van Juda, zeun van Josia, kreeg Jeremia dit woord van de HEER:
02"Dit zegt de HEER: Goa noar t hoes van de HEER tou, goa in veurhòf stoan en zeg tegen dij oet steden van Juda noar t hoes van de HEER kommen om hom te vereren, aal wat ik die bestel. En gain woord minder!
03Meschain lustern ze en kommen ze weerom van t verkeerde pad. Den zel mie t begroten van rampen dij ik in t zin haar heur aan te doun vanwege heur minne praktieken.
04Zeg doarom tegen heur: Dit zegt de HEER: As ie nait noar mie lustern en joe nait holden noar wet dij ik joe geven heb,
05as ie nait lustern noar mien knechten, de profeten, dij ik aalweg vannijs, mor vergees, noar joe toustuur,
06den dou ik mit dit hoes krekt t zulfde as ik mit Silo doan heb. Vervlökt zel dizze stad wezen bie ale volken op eerde."
07Priesters, profeten en aal t volk dat ter touhuil, heurden Jeremia dit altmoal roupen.
08Mor naauw was Jeremia kloar en haar e ales zegd wat de HEER hom besteld haar, of priesters, profeten en aal t aander volk grepen hom en raipen: "Nou gaaist ter aan!
09Hou duurst as profeet van de HEER te beweren: 'Dit hoes zel t krekt zo vergoan as t haailegdom van Silo en dizze stad wordt n puunbult zunder bewoners!'" Altmoal mitnkander vlogen ze op Jeremia òf in de HEER zien hoes.
10 Dou t vernoame volk van Juda heurde wat ter loos was, gingen ze van t pelaais noar de HEER zien hoes tou en gingen zitten bie Nijpoort.
11 Priesters en profeten zeden tegen heur en tegen elk dij der bie was: "Dizze kerel mout doodstraf kriegen. Hai het tegen dizze stad profetaaierd! Ie hebben t mit aigen oren heurd."
12 Mor Jeremia zee tegen hoge heren en aal t aander volk: "Ale draaigementen tegen dizze tempel en dizze stad, dij ie heurd hebben, heb ik aankundegd in opdracht van de HEER.
13 Beter doarom joen levent, luster noar de HEER, joen God. Meschain begroot hom t den van t onhaail dat hai joe aandoun wol.
14 Vanzulm, mit mie kin ie doun wat ie willen, ie hebben mie ja in joen macht.
15 Mor as ie mie doodmoaken, mout ie goud bedenken dat ie mie onschuldeg ombrengen. Doar zel joe t noar vergoan. En joe nait allenneg, mor dizze stad en dij der wonen ook. Ales wat ik joe aanzegd heb, het de HEER mie besteld."
16 Dou zeden hoge heren en t aander volk tegen priesters en profeten: "Dizze man huift nait dood. Hai het ons aantoald in de HEER zien noam!"
17 n Poar oldsten kwammen in t èn en zeden tegen haile vergoadern:
18 "In tied van keunenk Hizkia van Juda was Micha oet Moreset, profeet. Dij zee tegen aal t volk: 'Dit zegt de HEER van de machten: Sion wordt omplougd as n stok laand, Jeruzalem wordt n puunbult, tempelbaarg staait vol roet.'
19 Toch hebben keunenk Hizkia van Juda en zien volk hom nait doodmoaken loaten. Nee, net aansom, Hizkia haar ontzag veur de HEER en perbaaierde hom noar t zin te doun. Dou begrootte de HEER t van ellèn doar hai mit draaigd haar. Wie zollen ons zodounde n swoare schuld op haals hoalen."
20 Der het nog ais n profeet west dij optreedde in noam van de HEER: Uria, zeun van Semaja, oet Kirjat-Jearim. Hai zee stad en laand t zulfde aan as Jeremia dee.
21 Keunenk Jojakim, zien ofsieren en hoge heren heurden der van en perbaaierden hom dood te moaken.
22 Dou Uria dat vernam, wer e benaauwd en muik e dat e vot kwam noar Egypte. Mor keunenk Jojakim stuurde Elnatan, ain van Achbor, mit n man of wat noar Egypte tou.
23 Dij huilen Uria oet Egypte weerom noar keunenk Jojakim. Dij luit hom kop ofhaauwen en zien liek op n bult smieten in aarmgraf.
24 Aal mit aal was t benoam aan Achikam, zeun van Safan, te daanken dat Jeremia nait in handen kwam van t minne goud dat hom dood hebben wol.
|
