Jeremia 18
01Dit woord van de HEER kreeg Jeremia:
02"Goa noar poddebakkers hoes tou. Doar zel ik die heuren loaten, wat of ik die te zeggen heb."
03Ik ging noar t hoes van poddebakker tou. Hai was net op draaischief dounde.
04Dou pot doar e mit aan t waark was hom onderhanden mishotjede, begunde hai mit n nije, dij hom aal aanston.
05Dou kreeg ik dit woord van de HEER:
06"Volk van Israël, zol ik mit joe nait t zulfde doun kinnen as dizze poddebakker - godssproak van de HEER. Krekt as poddebakker klaai onder handen het, bin ie in mien haand, hoes van Israël.
07Aine keer kundeg ik n volk of n keunenkriek aan dat ik ze votrop, ofbreek, of vergraim -
08mor as t volk, doar of ik mie tou keerde zok bekeert, den muit mie t van aal dij ellèn doar ik heur mit bedraaigd heb.
09n Aander moal kundeg ik n volk of n keunenkriek aan dat ik t opbaauwen zel en poten -
10 mor as ze doun wat ik nait hebben wil en as ze nait noar mie lustern, den muit mie t van aal t goie dat ik mit heur in t zin haar.
11 Nou den, zeg tegen lu van Juda en inwoners van Jeruzalem: Zo zegt de HEER: Ik smeed n plan en beroam onhaail tegen joe. Kom van t verkeerde pad òf en beter joe!
12 Mor zai zellen tegen joe zeggen: 'Muite veur niks! Wie goan ons aigen weg, wie volgen ons aigen kwoaie kop!'
13 Vroag volken der doarom noar
- zo zegt de HEER.
Verstoa joe der noar bie volken
of ain ooit zukswat heurd het,
zoks ofgriezelks as Israël dee.
14 Stainen in t laand, snij op de Libanon,
verswinnen dij wel ooit?
Stromend wotter en borrelnde wèllen,
dreugen dij wel ooit op?
15 Mor mien volk het mie vergeten,
ovvers brengen ze aan goden van niks.
Op heur aigen vertraauwde wegen binnen ze strovveld,
ziepoaden binnen ze insloagen, doar boan nait deur is.
16 n Schrik hebben ze moakt van heur laand,
n taiken van aiwege spot.
Elk dij der deurtrekt, staait versteld
en schudt meedliedend kop.
17 As oostewind joag ik heur oet nkander veur vijand.
Op dag van t onhaail
keer ik heur mien rug tou
en nait mien gezicht."
18 "Ze zeden: 'Loat ons n aanslag op Jeremia doun.
Nooit is ter ja verlet
bie priesters om onderricht,
bie wieze lu om goie road
of bie profeten om woorden.
Wie mouten van ons ofbieten,
nait meer om zien zeggen geven!'
19 Heur mie, HEER,
luster noar mien kloagen.
20 Mag men goud mit kwoad vergelden?
Toch groaven ze veur mie n koel.
Vergeet toch nait dat ik veur joe ston
om n goud woord veur heur te doun,
joen kwoadens van heur te keren.
21 Loat heur kinder doodgoan van honger,
lever heur oet aan t sweerd.
Loat vraauwlu achter zunder kinder, zunder man.
Aan de pest zellen heur manlu staarven,
heur jonges omkommen deur t sweerd.
22 Schraiven zel men heuren oet heur hoezen,
as ie heur rompslomps rovers op dak sturen.
Want ze hebben n koel groaven om mie te vangen,
strupen zet veur mien vouten.
23 HEER, ie kennen heur moorddoadege plannen,
zai heur minne doaden nait deur vingers,
hol heur zunden veur ogen.
Joa, loat heur veur joen ogen beswieken,
reken mit heur òf as joen kwoadens lösbrekt."
|
