Jeremia 11
01Jeremia kreeg dit woord van de HEER:
02"Luster noar de bedingen van dit verbond en vertel ze aan inwoners van Juda en bewoners van Jeruzalem:
03Dit zegt de HEER: Vervlökt is man, dij zok nait holdt noar veurschriften van t verbond
04dij ik joen veurolden doan heb bie heur oettocht oet dij iesderovent van Egypte. Ik zee dou tegen heur: 'Luster noar mie en dou ales wat ik joe bestel. Den zel ie mien volk wezen en ik joen God.
05Den hol ik mie aan aid dij ik joen veurolden sworen heb en dou ik heur n laand dat overlopt van melk en hunneg. En doar heb ik mie ook aan holden!'" Ik zee: "Zo is t en nait aans, HEER!"
06De HEER weer: "Roup dit altmoal om in steden van Juda en stroaten van Jeruzalem: Luster noar veurschriften van dit verbond en hol joe der noar.
07Sunt ik joen veurolden oet Egypte hoald heb tot vandoag aan dag tou, heb ik heur woarschaauwd, aalgedureg en mit klem: Luster noar mie!
08Mor zai hebben nait heuren wild en nait om mien zeggen geven. Ze bleven mor stief deurgoan mit heur min gedrag. Doarom voerde ik draaigementen van t verbond oet. Ze haren zok doar aan holden mouten, mor ze trokken zok ter gain spier van aan."
09De HEER zee tegen mie: "t Liekt wel of Judeeërs en t volk van Jeruzalem mit nkander in t komplöt zitten.
10 Ze binnen terogvalen in zunden van heur veurolden, dij ook al waaigerden te lustern noar mien veurschriften. Ze binnen aander goden achternoalopen en hebben dij daind. Israël en Juda hebben t verbond broken dat ik mit heur veurolden aangoan was.
11 Doarom - zegt de HEER: Ik breng ellèn over heur. Doar zellen ze nait aan ontkommen kinnen. En hou of ze mie den ook om hulp roupen, ik zel nait noar heur lustern.
12 Loat steden van Juda en t volk van Jeruzalem hulp mor inroupen van goden doar ze ovvers aan brocht hebben. Loat dij heur mor redden in tied van nood.
13 Ie hebben krekt zo veul goden as steden, Juda, en zo veul altoars as stroaten, Jeruzalem, om ovvers te brengen aan Baäl.
14 Jeremia, beed mor nait meer veur dit volk, blief mor nait aal jammern, ik luster toch nait as ze in heur ellèn om mie roupen.
15 Laiverd, wat dustoe in mien hoeske?
Kinnen touzeggens en ovverdaaiern rampen keren?
Dat zolst wel willen!
16 Mooie gruine olieveboom,
zee de HEER tegen die.
Mor in n dikke dunderbui
luit hai hom in vlammen opgoan,
mit toeken en aal.
17 De HEER van de machten dij joe plant het, ropt nou dik ellèn over joe òf: Israël en Juda hebben ja kwoad aanricht, aargerd hebben ze mie en ovvers brocht aan Baäl."
|
