Bijbelrooster voor 10 maart 2024
Jeremia 29:1-14:
01Hier komt tekst van braif dij profeet Jeremia stuurde van Jeruzalem noar vernoamste oldsten dij verbannen wazzen en noar priesters, noar profeten en ale mensken dij Nebukadnessar noar Babel overbrocht haar.
02Keunenk Jechonja en zien moe, hofdainders, oadel van Juda en Jeruzalem, smeden en slöddemoakers wazzen dou al oet Jeruzalem vot.
03Hai dee braif mit aan Elasa, zeun van Safan, en aan Gemarja, ain van Chilkia, dij as ofgezanten van keunenk Sedekia van Juda noar keunenk Nebukadnessar van Babel tou gingen.
04"Dit zegt de HEER van de machten, Israëls God, tegen ale lu dij ik oet Jeruzalem noar Babel verdreven heb:
05Ie mouten hoezen baauwen en doar in wonen goan, toenen aanleggen en vrucht ter van eten,
06ie mouten traauwen goan en kinder kriegen, vraauwlu kaizen veur joen zeuns en manlu geven aan joen dochters, dij op heur toer weer kinder kriegen. Zörg dat ie doar aanwinnen en nait inkrimpen.
07Dou joen best dat t stad goud gaait doar ik joe noar verdreven heb en beed ter veur tot de HEER, want as t stad goud gaait, gaait joe t ook goud.
08Dit zegt de HEER van de machten, God van Israël: Loat joe nait mislaaiden deur profeten en woarzeggers bie joe. Luster nait noar heur dreumen.
09Zai misbruken mien noam om leugens te verkopen. Ik heb heur nait stuurd - godssproak van de HEER.
10 Want dit zegt de HEER: Eerst as de seuventeg joar van Babel om binnen, zel ik weer noar joe omkieken. Ik zel doun wat of ik joe touzegd heb en breng joe noar dit stee weerom.
11 Ik wait wat ik mit joe veurnemens bin - godssproak van de HEER: Ik verzeg joe welwezen en nait joen ongelok, n hoopvolle toukomst.
12 As ie mie aanroupen en tot mie beden, zel ik joe verheuren.
13 As ie mie zuiken, joa, zuiken mit joen haile haart, zel ie mie vinden.
14 Den loat ik mie deur joe vinden - godssproak van de HEER. Ik moak joe weer zo as ie vrouger wazzen. Oet ale volken en ploatsen doar ie hèndreven binnen, breng ik joe weer bie nkander - godssproak van de HEER. Ik breng joe weerom noar dit stee, doar ik joe vandoan voerd heb.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
