Bijbelrooster voor 16 februari 2024
Jeremia 14:17-22:
17 Dit mostoe tegen heur zeggen:
Loat troanen mie over wangen stromen,
dag en naacht,
dat ter komt gain èn aan,
want n aldernoarste ramp
het mien dochter trovven,
n swoare slag velde mien volk.
18 As ik tou stad oet goa, den zai ik heur doar liggen,
deelsloagen deur t sweerd.
As ik tou stad in kom, den zai ik heur doar liggen,
verkommerd van honger.
Alderdeegs profeten en priesters
slepen ze vot noar n onbekend laand."
19 "Heb ie Juda verstöt,
heb ie n ofgries van Sion kregen?
Woarom heb ie ons den zo slim sloagen,
dat t nait weer beter wordt?
Wie hoopten op vree,
mor aal wat ter kwam ...
n Tied van beterschop haar we verwacht,
mor ellèn bleef aanduren.
20 HEER, wie willen t wel waiten
dat we verkeerd doan hebben,
wie en ons veurolden,
dat we zundegd hebben tegen joe.
21 Om joen noam, dou t nait,
steut ons nait aan zied.
Denk toch aan joen verbond mit ons,
verbreek dij nait.
22 Kinnen goden van volken t meschain regen loaten,
of komt dat vanzulm tou lucht oet valen?
Nee, ie loaten dat gebeuren, HEER, God van ons.
Wie verwachten t van joe,
ie doun t ja aalmoal."
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
