Bijbelrooster voor 22 januari 2024
t Evengelie volgens Marcus 1:14-20:
|
14 Noadat Johannes oppakt was, ging Jezus in Galilea goie bosschop van God verkundegen.
15 Hai zee: "Tied is ter heer! Gods keunenkriek is stoef bie! Begun n nij levent en hol joe aan goie bosschop!"
16 Dou e bie t Galileameer langs laip, zag e Simon en dij zien bruier Andreas. Ze wazzen heur netten aan t oetgooien op t meer. t Wazzen ja viskerlu.
17 "Kom achter mie aan!" zee Jezus tegen heur. "Ik zel van joe menskenviskers moaken!"
18 Op slag luiten ze heur netten liggen en gingen achter hom aan.
19 n Èndje wieder zag e Jakobus en zien bruier Johannes, Zebedeüs zien jonges. Dij wazzen dounde heur netten noa te kieken in boot.
20 Votdoalek raip e heur. Zai luiten heur voader Zebedeüs mit zien loonaarbaiders in boot achter en gingen mit hom wieder.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug
