Bijbelrooster voor 22 januari 2022
Jesaja 43:14-21: Kiek nait achter mor veuroet
14 Zo zegt de HEER, joen verlözzer,
Haailege van Israël:
Om joe stuur ik ain noar Babel tou,
dou knip van ale deuren òf:
jammern en jeuzeln zellen dij Chaldeeërs!
15 Ik bin de HEER, joen Haailege,
schepper van Israël, joen keunenk.
16 Zo zegt de HEER,
dij dwaars deur zee n weg aanlegt,
deur t machtege wotter n pad,
17 dij woagens en peerden,
mit haile legermachten
en ales wat ze mor hebben oetrukken let -
doar liggen ze, of kommen ze nooit weer in t èn,
as n vlaspit, oetdoofd en oetknepen.
18 Blief nait stilstoan bie wat vrouger was,
geef nait aal joen aandacht aan t verleden;
19 Ik, ik dou wat nijs,
t is al aan t oetspieren - zain ie t nait?
Joa, in woestijn leg ik n weg aan,
moak revieren deur t onlaand.
20 Wilde daaiern zellen mie eren,
jakhaalzen en struusvogels,
ik zörg veur wotter in woestijn,
en veur revieren in t onlaand,
om dörst te stillen van t volk dat ik oetkeurd heb.
21 t Volk dat ik mie vörmd heb,
verkundegen zel t mien lof!
|
Ga naar het volledige bijbelrooster
(Op basis van rooster: www.bijbelgenootschap.nl)
Terug