Bijbelrooster voor 2 april 2019
Leviticus 4:27-35: Vergeven is nait goudkoop
27 As ain aans van t volk nait mit opzet zundegt tegen ain van de HEER zien geboden en schuld over zok brengt deur wat te doun wat nait mag,
28 mout e, zo gaauw as e beseft wat e misdoan het, as zuvernsovver n bok aanbaiden zunder lek of brek.
29 Hai mout haand op t daaier zien kop leggen en hom slachten op t stee doar daaiern veur t brandovver slacht worden.
30 Priester strikt den mit vinger wat bloud van t ovverdaaier aan hoorns van t altoar veur brandovvers. Wat of ter van t bloud overbleven is, gut e oet aan vout van t altoar.
31 Ale vet mout e vothoalen, krekt as ook doan wordt mit t vet van vree-ovver, en hai mout t op t altoar in rook opgoan loaten as n lekker roekende goave doar de HEER nocht aan het. Zo zel priester verzoenen doun veur dij persoon en krigt e vergeven.
32 Dij n schoap as zuvernsovver aanbudt, mout n ooi nemen zunder lek of brek.
33 Hai mout haand op t daaier zien kop leggen en hom as zuvernsovver slachten op t stee doar daaiern veur t brandovver slacht worden.
34 Priester strikt den wat bloud van t ovverdaaier aan hoorns van t altoar veur brandovvers. Wat ter van t bloud overbleven is, gut e oet aan vout van t altoar.
35 Ale vet mout e vothoalen, krekt as dat doan wordt mit t vet van schoap veur t vree-ovver. Hai mout dat op t altoar in rook opgoan loaten, mit aal aander ovvergoaven veur de HEER. Zo zel priester verzoenen doun veur dij persoon en krigt e vergeven.
|
Ga naar het volledige bijbelrooster
(Op basis van rooster: www.bijbelgenootschap.nl)
Terug