|
12 Doudestieds gebeurde t dat e noar baarg tou ging om te beden en haile naacht deur in gebed was mit God.
13 Dou dag aanbroken was raip e zien leerlingen bie zok en koos der twaalf oet, dij hai ook noam gaf van apostels:
14 Simon, dij hai ook Petrus nuimde, Andreas, zien bruier, Jakobus,
15 Johannes, Filippus, Bartolomeüs, Matteüs, Tomas, Jakobus, Alfeüs zien zeun,
16 Simon, mit bienoam Vrijhaidsstrieder, Judas, Jakobus zien zeun, en Judas Iskariot, dij verroader worden is.
17 Hai ging mit heur omdeel en bleef stoan op n vlak stee. Doar was n dikke koppel van zien leerlingen en n bult volk oet t haile Jeudse laand en Jeruzalem en ook oet kuststreek van Tyrus en Sidon.
18 Dij wazzen kommen om noar hom te lustern en om van heur kwoalen òf te kommen. Ook dij ploagd werden deur duvelse gaisten werden genezen.
19 Aal t volk perbaaierde hom aan te kommen, omreden der ging kracht van hom oet. En hai muik elkenain beter.
20 Dou sluig e ogen op noar zien leerlingen en zee: "Zoaleg dij aarm binnen, t keunenkriek van God is joenent.
21 Zoaleg dij nou honger lieden, ie zellen overvloud hebben. Zoaleg dij nou reren, ie zellen lagen.
22 Zoaleg bin ie as mensken joe hoaten en as ze joe oetsteuten en belastern en joen noam tou schaande moaken om Menskenzeun zien wil.
23 As dij dag komt, daans mor van bliedschop. Joen loon is ja groot in hemel. Op zulfde menaaier hebben heur veurolden ja doan mit profeten.
24 Mor o wai joe, dij riek binnen! Ie hebben joen dail al had.
25 O wai joe, dij nou overvloud hebben! Ie zellen honger lieden. O wai joe, dij nou lagen! Ie zellen kloagen en reren.
26 O wai joe, as mensken joe priezen! Op zulfde menaaier hebben heur veurolden ja doan mit vaalze profeten.
|
