Bijbelrooster voor 15 februari 2019

Jeremia 3:1-11: Dubbelharteg

⁰¹"As n man zien vraauw votstuurt en zai gaait vot om te traauwen mit n aander, zel hai ooit den nog bie heur weeromkommen? Is dit laand den nait onteerd? Ie hebben joe ofgeven mit alderhande vrijers en nou wil ie bie mie weeromkommen - godssproak van de HEER.
⁰²Is ter op heuvels wel n stee doar ie joe nait bruken loaten hebben?
Aan kaant van weg zit ie te wachten
zo as n Arabier in woestijn.
Zo heb ie dit laand onteerd
mit joen klongelderij en wangedrag.

⁰³Dou regen tegenholden wer en veujoarsregen ook nait kwam,
bleef ie bretoal rondkieken -
krekt as n hoer.

⁰⁴En nog duur ie te roupen: 'Ie binnen mien voader,
mien vrund van jongs òf aan.

⁰⁵Hai blift nait kwoad, is nait gedureg oet op vroak.'
Dat zeg ie, en in tied dou ie
t aine kwoad noa t aander."
⁰⁶In tied van keunenk Josia zee de HEER tegen mie: "Hestoe zain wat Israël, dij ofvalege, hom leverd het? Hou of dij op baargen bie elke gruine boom omklongeld het? ⁰⁷Ik dochde: As ze doar altmoal genog van het, komt ze wel bie mie weerom. Mor dat dee ze nait! Heur zuster Juda, dat onbetraauwboar wicht, haar t vernomen. ⁰⁸Ze haar zain dat ik Israël, dij ofvalege, om heur klongeln verstöt haar en heur n bewies van oftraauwen doan. Mor heur zuster Juda, dij onbetraauwboare, luit zok doar nait deur ofschrikken, zai ging zulm ook aan t klongeln. ⁰⁹Zunder zok woaraarns wat van aan te trekken, onteerde ze t laand mit heur lichtzinnege klongelderij. Ze speulde de hoer mit goden van stain en van holt. ¹⁰ Noa aal dij bedrieven kwam heur zuster Juda, dat onbetraauwboar wicht, wel weerom; mor mainen dee ze der niks van, ze dee mor zo - godssproak van de HEER." ¹¹ Dou zee de HEER tegen mie: "Israël, dij ofvalege, is nog haaileg vergeleken bie Juda, dat onbetraauwboar ding.

Ga naar het volledige bijbelrooster

(Op basis van rooster: www.bijbelgenootschap.nl)

Terug